Nafta, e qëndrueshme pranë 72 USD për fuçi – Çmimet humbën mbi 2.5% të vlerës të martën, shqetëson ngadalësimi i kërkesës
Nafta po qëndron në rritje në sesionin e sotëm, pasi investitorët janë të shqetësuar për tkurrjen e furnizimit të tregun në Shtetet e Bashkuara që është ekonomia më e madhe konsumatore e naftës në botë. Të dhënat e publikuara të martën treguan se rezervat e naftës ranë më shumë se parashikimet e tregjeve, për shkak të prodhimit të ulët. Nafta Brent e Londrës po tregtohet në rreth 72.5 dollarë për fuçi, ndërsa nafta Bruto amerikane po tregtohet në rreth 68 dollarë për fuçi.
Të dyja kontratat ranë ndjeshëm, me mbi 2.5% në sesionin e kaluar, për shkak të sinjaleve se bankat qendrore nuk kanë mbaruar ende punë me rritjen e normave të interesit. Ndërkohë, sipas të dhënave jo zyrtare të Institutit Amerikan të Naftës, rezervat e naftës bruto në SHBA ranë me 2.4 milionë fuçi, gjatë javës së kaluar, ndërsa analistët parashikonin një rënie me 1.7 milionë fuçi. Megjithatë, investitorët po presin të dhënat zyrtare që do të publikohen më vonë gjatë ditës së sotme nga Administrata për Informimin mbi Energjinë.
Ndër zhvillimet e tjera, Presidentja e Bankës Qendrore Europiane, Christine Lagarde, deklaroi të martën në Forumin e Sintras në Portugali se inflacioni do të qëndrojë i lartë edhe për një kohë të gjatë, që mund të dëmtojnë aktivitetin ekonomik dhe kërkesën për naftë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.