Bashkëpunimi rajonal në bujqësi – Denaj: Duhet rrjetëzim i fermerëve, forcon ekonominë rurale dhe rrit sigurinë ushqimore

Mbi 90 biznese bujqësore e prodhues nga Shqipëria, Kosova, Maqedonia, Italia, Spanja, Zvicra, Gjermania, etj. u bënë pjesë e Panairit Ndërkombëtar të Bujqësisë, Teknologjive, Ushqimit dhe Përpunimit që u çel në qytetin e Lushnjës. Teksa vizitoi panairin, ministrja e Bujqësisë dhe Zhvillimit Rural, Anila Denaj theksoi rëndësinë që ka bashkëpunimi rajonal në bujqësi, në drejtim të forcimit të ekonomisë rurale dhe rritjes së sigurisë ushqimore për konsumatorët.

“Një bashkëpunim rajonal, por njëkohësisht për të kuptuar që mes nesh marrëdhëniet e vendeve dhe komunikimi i bizneseve është i rëndësishëm për ne si politikëbërës për të operacionalizuar jetën e tyre pa barriera, pa vështirësi dhe pa burokraci”, – u shpreh Denaj.

Denajt u ndal dhe te nxitja e prodhimit vendas, jo vetëm në funksion të eksporteve, por dhe në drejtim të plotësimit të nevojave për konsum të brendshëm.

“Unë jam shumë e lumtur që për këtë 3-mujor të parë të vitit 2024 në krahasim me 2023-shin, kemi një rritje me 11.6% dhe besoj që ky trend do të vijojë. Ne nuk mund t’a mendojmë ofertën ushqimore vetëm të nxitur nga eksportet. Sot oferta ushqimore për konsumin e brendshëm e tejkalon presionin për eksporte me gati 1.5 herë, pasi jo vetëm numri i turistëve ka ardhur eksponencialisht në rritje dhe këtë vit parashikohet që të jetë 14 milionë turistë për Shqipërinë, por edhe vetë konsumi i brendshëm shqiptar bën një presion për të prodhuar”, – tha Denaj.

Gjatë aktivitetit u theksua nevoja për nxitjen e bashkëpunimeve të reja në bujqësi, si dhe rrjetëzimi i fermerëve dhe ekspertëve të sektorit me marka ndërkombëtare dhe me aktorët kryesorë të cilët ndikojnë zhvillimin e sektorit.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.