Amerikanët dhe nordikët, interes për të blerë prona tek ne – “Jo vetëm për turizëm”, Beti: Të huajt shohin Shqipërinë si investim dhe banim

Ndërtimi në Shqipëri është një nga ata sektorë i cili po vijon me rritje të shpejta, gjë e cila ka bërë që të huajt të shfaqin interes për të blerë prona apo apartamente në Shqipëri. Por nga cilat shtete janë ata të huaj të cilët kanë investuar në prona dhe apartamente në Shqipëri?

Orgest Beti Agjent Imobiliar; “Si zakonisht kampion mbajnë italianët, pasuar nga polakët, çekët, së fundmi shikojmë shumë Europën Qëndrore, Gjermaninë, Francën por kemi një numër të shtuar turistësh amerikanë, nordik së fundmi. Mund të flasim për një numër të konsideruar turistësh të cilët tashmë Shqipërinë nuk e shohin si një mundësi për pushime por e shikojnë dhe si një mundësi shumë të mirë investimi dhe banimi”

Sipas Betit, tashmë është periudha më e favorshme që të huajt bëjnë më shumë investime në prona të patundshme.

“Çdo vit kemi një rritje 5-10%, që është një rritje progresive në vit, numri i shitjeve i apartamenteve në këtë periudhë është maksimal për shkak se bëhet gati për fillimin e sezonit, fillojnë t’i blejnë që në këtë fazë që më pas t’i bëjnë mobilimin dhe më pas në korrik gusht po themi, kthehen dhe i bëjnë pushimet e tyre”.

Por sa kohë ka që të huajt frekuentojnë Shqipërinë për të blerë prona?

“Zakonisht turistët e parë kanë ardhur rreth viteve 94’-95’. Periudha që ka pasur bumin më të madh e ka flasim pas vitit të pandemisë, pas vitit 2021, deri tani në 2024 ne shohim një rritje progresive.”

Sipas Betit, periudha që ka më shumë fluks për blerje apartamentesh në zonën e bregdetit është nga marsi deri në maj, që kryesisht shfrytëzohen për pushime. Por për ata persona që i marrin për investime, blejnë pas shtatorit që t’i rifusin në treg, ose i japin me qira.

Diamila Leka/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.