BE blen avionë të rinj për fikjen e zjarreve – Të dhënat paralajmërojnë përkeqësimin e krizave klimatike

Bashkimi Europian synon të nënshkruajë kontrata këtë vit për blerjen e 12 avionëve zjarrfikës, të parët që do të zotëronte plotësisht, për të përmirësuar aftësinë për të luftuar flakët e nxitura nga ndryshimet klimatike.

BE dyfishoi flotën e saj rezervë ekzistuese të avionëve zjarrfikës vitin e kaluar, pasi zjarret shkatërruese verën e kaluar në Europën Jugore shteruan kapacitetin e saj të mëparshëm prej 13 mjetesh.

Flota përbëhet nga 28 avionë, të cilët BE-ja i paguan për t’i dhënë me qira nga flotat e vendeve të BE-së ose tregu, për të formuar një front në të gjithë bllokun gjatë sezonit të zjarreve. Ky dyfishim i numrit të tyre pritet të kushtojë 23 milionë euro, tha Komisioni Europian, krahu ekzekutiv i BE-së.

Por ndërsa ndryshimi i klimës rrit rrezikun e zjarreve të rënda, Komisioneri i BE-së për Menaxhimin e Krizave Janez Lenarcic tha se Brukseli donte që kontratat të nënshkruheshin këtë vit për të blerë 12 avionë në pronësi të BE-së, plus 12 të tjera për të forcuar flotën kombëtare të vendeve.

Në një deklaratë për agjencinë e lajmeve Reuters ai u shpreh se BE mund të ketë aeroplanët e parë dy vjet më vonë. Dhe e gjithë flota do të plotësohet deri në fund të dekadës.

Prodhuesi De Havilland Canada ka rënë dakord të rifillojë prodhimin e avionit “Canadair”, nëse vendosen porositë e BE-së, tha Lenarcic.

Gjashtë shtete anëtare do të nënshkruajnë kontratat: Kroacia, Franca, Greqia, Italia, Portugalia dhe Spanja. BE-ja do të financojë blerjen e 12 avionëve për flotën e saj, ndërsa shtetet anëtare do të paguanin për të tyren.

Europa po përballet me një verë tjetër të motit ekstrem. Zjarret në Greqi kanë marrë jetën e tre personave dhe kanë bërë që mijëra turistë të evakuohen, ndërsa zjarrfikësit italianë thanë se luftuan rreth 1.400 zjarre midis të dielës dhe të martës.

Vendet e BE-së janë përgjegjëse për reagimin ndaj zjarreve dhe kërkojnë ndihmë nga rezerva e BE-së vetëm kur kanë nevojë për mbështetje. BE-ja mund të ofrojë gjithashtu mbështetje urgjente për vendet jo anëtare të BE-së. Blloku mori 11 kërkesa të tilla në vitin 2022 dhe ka pasur katër këtë vit deri më tani – duke përfshirë Greqinë dhe Tunizinë, vende ku avionët rezervë të BE-së aktualisht po luftojnë me flakët.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.