BE miraton ndihmën e re shtetërore për bizneset – Gjermania dhe Franca janë përfitueset më të mëdha të fondeve

Pavarësisht kundërshtimeve të ngritura nga shtetet më të vogla anëtare, BE zgjati deri në mars të vitit të ardhshëm lehtësimin e rregullave të ndihmës shtetërore, pasi mjaftoi konsensusi i dy ekonomive më të mëdha të Eurozonës, Gjermanisë dhe Francës. Të dyja vendet do të përfitojnë më së shumti, pasi do të mund të japin deri në 2 milionë euro kredi apo garanci dhe të forcojnë bizneset e tyre, veçanërisht ato që preken nga rritja e kostos së energjisë.

Kjo është masa emergjente e vendosur nga Komisioni në dimrin e vitit 2022, kur kriza energjetike ishte në kulmin e saj pas pushtimit rus të Ukrainës, duke dobësuar bizneset europiane, shumë prej të cilave ishin në gjunjë për shkak të kostos së papërballueshme të energjisë. Megjithatë, ishte gjithashtu një masë që shkaktoi përçarje brenda BE-së, pasi përfituan ato ekonomi të mëdha dhe të fuqishme që ishin në gjendje të mbështesnin bizneset e tyre, duke i vënë në disavantazh dhe më të madh vendet më të vogla dhe më të dobëta ekonomikisht, të cilat nuk kishin aftësitë përkatëse.

Aktualisht, situata energjetike duket se është përmirësuar ndjeshëm, ashtu si edhe çmimet e energjisë. Furnizimi është i mjaftueshëm dhe moti jashtëzakonisht i butë për sezonin, duke i mbajtur çmimet e energjisë në nivele relativisht të ulëta. Komisioni europian prezantoi planin e tij duke justifikuar zgjatjen e masës me përkeqësimin e ekonomisë.

Në fund të muajit të kaluar, zyrtarët apeluan për një BE të vetme, me një treg të përbashkët, sisteme të harmonizuara tatimore dhe licencimi dhe një kuadër rregullator të thjeshtë, të qëndrueshëm dhe të parashikueshëm për të lehtësuar investimet.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.