BE “shpërbën” sektorin e reklamave të Google – Kompania dënohet për konkurrencë të padrejtë

Google u akuzua nga rregullatorët e BE-së për praktika anti-konkurruese në biznesin e saj të reklamave dixhitale, të cilat tani mund t’i duhet t’i shesë pjesërisht. Pasojat janë më të rënda për Google në këtë përplasje të fundit me rregullatorët pasi ka të bëjë me prodhuesin më të madh të parave të kompanisë, me biznesin ‘adtech’ që përbënte 79% të të ardhurave totale vitin e kaluar.

Të ardhurat e saj nga reklamat për vitin 2022, përfshirë shërbimet e kërkimit, Gmail, Google Play, Google Maps, reklamat në YouTube, Google Ad Manager, AdMob dhe AdSense, arritën në 224.5 miliardë dollarë. Komisioni Europian paraqiti akuzat e tij në një deklaratë, dy vjet pas hapjes së një hetimi.

Komisionerja për Konkurrencën, Margrethe Vestager, tha se Google mund t’i duhet të shesë një pjesë të biznesit të saj ‘adtech’ si e vetmja mënyrë në ndalimin e praktikave anti-konkurruese. Ajo u shpreh se vendimi ishte i ashpër, por është një reflektim i natyrës së tregjeve, se si funksionojnë ato dhe gjithashtu pse një ‘qorim i thjeshtë’ dukej se ishte jashtë diskutimit. Vestager shtoi se BE kishte bashkëpunuar ngushtë me autoritetet e konkurrencës në Shtetet e Bashkuara të Amerikës dhe Mbretërinë e Bashkuar.

Komisioni tha se kishte mosmarrëveshje me Google që favorizonte shërbimet e veta të teknologjisë së reklamimit në internet në dëm të ofruesve konkurrues të shërbimeve të teknologjisë së reklamimit, reklamuesve dhe botuesve në internet.

Google është platforma dominuese e reklamave dixhitale në botë me një pjesë të tregut prej 28% të të ardhurave globale nga reklamat, sipas ‘Insider Intelligence’. Google kishte kërkuar të zgjidhte çështjen tre muaj pas hapjes së hetimit, por rregullatorët u zhgënjyen me ritmin e ngadaltë dhe mungesën e lëshimeve thelbësore.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.