BE vendos viza për amerikanët dhe britanikët – Aplikimi do të mund të kryhet në platformën online

Bashkimi Europian po kërkon të zbatojë Sistemin Europian të Informacionit dhe Autorizimit të Udhëtimit – ETIAS, i cili do të zbatohet për udhëtarët nga vendet pa viza, përfshirë SHBA-në dhe Britaninë e Madhe, të cilët do të kërkojnë vizë në cilindo nga vendet europiane.

Për të aplikuar për ETIAS, udhëtarët amerikanë dhe britanikë do të duhet të plotësojnë një aplikim online së bashku me informacionin biografik, planet e udhëtimit, historinë e udhëtimit dhe pyetjet e lidhura me sigurinë. Procesi i miratimit pritet të jetë i shpejtë dhe shumica e aplikantëve do të marrin miratimin e tyre brenda një ore. Megjithatë, mund të kërkohen kontrolle shtesë në raste të caktuara dhe më pas procesi do të zgjasë deri në katër ditë për të përfunduar.

Kostoja e marrjes së një autorizimi udhëtimi është 8 dollarë për udhëtarët amerikanë dhe 6 paund për udhëtarët nga Mbretëria e Bashkuar. Pasi të miratohet, ETIAS do të jetë i vlefshëm për hyrje të shumëfishta gjatë një periudhe prej tre vjetësh ose deri në skadimin e pasaportës së udhëtarëve.

Fillimisht e planifikuar për t’u zbatuar në vitin 2022, aktivizimi i ETIAS u vonua në vitin 2024 për shkak të përditësimeve në infrastrukturën e udhëtimit. Qëllimi kryesor i prezantimit të ETIAS është rritja e masave të sigurisë me objektivin e një udhëtimi të qetë për vizitorët në Europë. Duke mbledhur informacion thelbësor për udhëtarët përpara mbërritjes së tyre, autoritetet europiane mund të vlerësojnë rreziqet e mundshme dhe të garantojnë sigurinë e turistëve dhe banorëve të BE-së.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.