Prilli mbyllet me optimizëm për ekonominë – Përkeqësohet vetëm ndërtimi për shkak të nivelit aktual të porosive

Treguesi i Ndjesisë Ekonomike për muajin prill të këtij viti ka regjistruar rritje me 6.6 pikë, çka tregon se besimi në ekonomi po përmirësohet gradualisht krahasimisht me dy muajt e parë të vitit ku ky tregues ishte me rënie.

Shifrat e Bankës së Shqipërisë nëpërmjet Vrojtimit të Besimit Konsumator dhe të Biznesit sinjalizojnë se Treguesi i Ndjesisë Ekonomike gjatë muajit prill ka arritur pranë 113.8 pikëve, që tregon se është 13.8 pikë mbi mesataren historike. Institucioni sqaron në vrojtim se ky përmirësim i treguesit që mat besimin në ekonomi ka ardhur kryesisht  nga rritja e besimit në sektorët e industrisë, shërbimeve, tregtisë si dhe rritja e besimit konsumator. Në të kundërt , besimi në sektorin e ndërtimit  pësoi  një rënie të lehtë për të dytin muaj me radhë.

Treguesi  i  besimit  në  ndërtim  ra  lehtësisht  me  0.7  pikë  përqindje  në  muajin prill, ndërkohë që  në muajin mars  ky tregues ra me 0.9 pikë përqindje. Kjo ecuri këtë  muaj u përcaktua kryesisht nga vlerësimet më të ulëta për nivelin e porosive aktuale. Nga ana tjetër, pritjet për punësimin dhe për çmimet që do të vendosin në të ardhmen kanë regjistruar rritje.

Treguesi i besimit të industrisë u rrit me 3.5 pikë përqindje në muajin prill, ndikuar  nga  vlerësimet  më  optimiste  për  prodhimin  industrial aktual dhe  për porositë nga eksportet në të ardhmen .Gjithashtu, pritjet e bizneseve për prodhimin industrial në të ardhmen regjistruan rritje ndërsa pritshmëritë për çmimet kanë mbetur të pandryshuara.

Treguesi i besimit në shërbime u rrit ndjeshëm me 8.2 pikë përqindje, duke shënuar kështu nivelin më të lartë historik me 22 pikë përqindje mbi mesataren. Në këtë rritje kontribuan performanca  aktuale e  aktivitetit të bizneseve  si  dhe rritja e   nivelit të   kërkesës nga konsumatorët.

Gjithashtu, Treguesi i besimit  në  tregti  ka  shënuar  rritjen  më  të  lartë  të  të  gjithë treguesve këtë muaj, me rreth 9.3 pikë përqindje. Kjo rritje e fortë u ndikua kryesisht nga vlerësimet optimiste mbi ecurinë aktuale të biznesit si dhe pritjet për punësimin.

Nga ana tjetër, Treguesi i besimit konsumator u rrit  me  3.8  pikë  përqindje, duke  përforcuar prirjen rritëse të nisur muajin e kaluar. Konsumatorët vlerësuan në përmirësim situatën e tyre financiare, situatën ekonomike të vendit në të ardhmen si dhe blerjet në shuma të mëdha , ndërsa pritjet e konsumatorëve për papunësinë  dhe inflacionin në të ardhmen janë ulur.

Armela Duka/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.