Bie kërkesa ndërkombëtare për udhëtime – Shkak, konflikti mes Izraelit dhe Hamasit

Rezervimet e fluturimeve ndërkombëtare në mbarë botën kanë rënë që nga fillimi i konfliktit Izrael-Hamas, veçanërisht në Amerikë, pasi njerëzit anulojnë udhëtimet në Lindjen e Mesme dhe në mbarë botën. Të dhënat janë publikuar nga firma analitike e udhëtimeve ‘ForwardKeys’.

Kërkesa globale për udhëtime është dobësuar që kur grupi islamik palestinez Hamas vrau 1.400 njerëz në jug të Izraelit më 7 tetor, dhe Izraeli u përgjigj me sulme ajrore dhe tokësore në Gaza që autoritetet palestineze thonë se kanë vrarë mbi 10 mijë njerëz.

Sipas firmës ‘Forwardkeys’, kjo luftë është një tragjedi njerëzore dhe situata e krijuar pengon njerëzit të udhëtojnë në rajon, por gjithashtu ka dëmtuar besimin e konsumatorëve për të udhëtuar.

Rezervimet e fluturimeve ndërkombëtare nga Amerika ranë 10% në tre javët pas sulmit të 7 tetorit, krahasuar me numrin e biletave të shitura tre javë para sulmit.

Njerëzit në Lindjen e Mesme gjithashtu kanë udhëtuar më pak me biletat e fluturimeve ndërkombëtare të shitura në rajon që pësuan një rënie prej 9% në të njëjtën periudhë. Rezervimet e fluturimeve ndërkombëtare për të udhëtuar në rajon ranë me 26% në tre javët pas sulmit.

Rezervimet e fluturimeve ndërkombëtare ranë mesatarisht 5% në të gjithë rajonet, duke ndikuar në rikthimin global të udhëtimeve ndërkombëtare në nivelet e pandemisë.

Rezervimet një ditë para atij sulmi treguan se udhëtimet ajrore globale në tremujorin e fundit të vitit do të rikuperonin 95% të niveleve të vitit 2019, por nga fundi i tetorit perspektiva ka rënë përsëri në 88%.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.