Bitcoin ngjitet sërish në mbi 43,000 USD – JPMorgan: Ethereum do të ketë performancën më të mirë në 2024

Tregu i kriptomonedhave është rritur ndjeshëm në sesionin e sotëm, me botcoin që i është afruar sërish nivelit të 43,000 dollarëve. Tregu është mbështetur ndjeshëm nga vendimet e Rezervës Federale, mbrëmjen e së mërkurës.

Në konferencën për mediat pas takimit, shefi i FED, Jerome Poëell, deklaroi se cikli i rritjes së interesave ka arritur kulmin, ndërsa sinjalizoi të paktën 3 ulje gjatë vitit 2024. Ulja e interesave nga bankat qëndrore rrit oreksin e investitorëve për asete me risk, ku bën pjesë edhe tregu i kriptomonedhave. Sipas analistëve, investitorët kanë përfituar edhe nga çmimet e ulëta të kriptomonedhave, pas rënies së ditëve të fundit.

Treguesit kryesorë që ndjekin aktivitetin e “blockchain” të bitcoin, flukset e “minatorëve” dhe mesataren lëvizëse 200-ditore sugjerojnë se bitcoin është larg të qënit i mbivlerësuar dhe mund të vazhdojë të rritet në vitin 2024. Bitcoin (BTC), kriptomonedha më e madhe për nga vlera e tregut, është rritur mbi 160% këtë vit, duke performuar më mirë se asetet tradicionale si S&P 500, ari dhe dollari amerikan, me një diferencë të madhe.

Ndër zhvillimet e tjera, gjigandi i Wall Street, JPMorgan ka ofruar një panoramë të kujdesshme në lidhje me tregjet e kriptomonedhave në vitin 2024, por pret që ethereum të tejkalojë bitcoin dhe kriptovalutat e tjera për shkak të një përmirësimi që do ta bëjë “blockchain” e Ethereum më të shkallëzuar.

Ndërsa në lidhje me vendimin e pritshëm të Komisionit të Letrave me Vlerë dhe Shkëmbimeve në SHBA për të miratuar fondet e tregtuara në shkëmbim (ETF), JPMorgan thonë se nuk ka gjasa të nxisë fitime të mëdha. Ethereum ka të ngjarë të shkëlqejë për shkak të përditësimit të quajtur EIP-4844. Kjo do të thotë se “blockchain”-i i Ethereum do ta ndajë rrjetit në copëza, për të përmirësuar shpejtësinë e transaksioneve.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.