FED mbështet bursat, rriten me rreth 1.5% – Banka qendrore amerikane sinjalizon 3 ulje të interesave në 2024

Bursat europiane janë rritur ndjeshëm, me mbi 1.5% në sesionin e sotëm, pasi investitorët reaguan pozitivisht ndaj sinjaleve të Rezervës Federale për tw ulur 3 herë interesat, gjatë vitit të ardhshëm. Indeksi pan-Europian Stoxx 600 po qëndron në rritje me 1.4%, duke prekur nivelin më të lartë që nga janari i vitit 2022. Sektori minerar kryeson fitimet, në rritje me 3.5%, ndërsa thuajse të gjithë sektorët janë në territor pozitiv.

Komiteti Federal i Tregut të Hapur i mbajti normat e interesit të pandryshuara në një interval midis 5.25% dhe 5.5%, në përputhje me pritjet e Wall Street. Ndjenja e tregut u rrit pasi politikëbërësit sinjalizuan në të paktën tre ulje të normave vitin e ardhshëm.

Edhe indekset kryesore në Wall Street u rritën ndjeshëm, pas vendimeve të Rezervës Federale. Gjithashtu, edhe Banka Qendrore Europiane, Banka e Anglisë dhe Banka Kombëtare e Zvicrës i mbajtën të pandryshuara normat e interesit, në takimet e zhvilluara të enjten, në linjë me parashikimet e tregjeve.

Në anën tjetër, Banka Qendrore e Norvegjisë e rriti normën bazë të interesit me 25 pikë bazë, në totalin e 4.5%. Guvernatorja e Norges Bank, Ida Wolden Bache tha në konferencën për mediat pas takimit se inflacioni mbetet shumë i lartë, pavarësisht shenjave për ngadalësimin e ekonomisë.

Ndërkohë, indeksi DAX i Gjermanisë e kaloi nivelin e 17,000 mijë pikëve për herë të parë në histori, ndërsa gjatë këtij viti është rritur me 21%. Rritja vjen pavarësisht vështirësive të ekonomisë gjermane në muajt e fundit. Vendi hyri në një recesion teknik në tremujorin e parë të 2023 dhe pritet gjerësisht të tkurret këtë vit.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.