Biznes në ofrimin e kurseve profesionale? – Përcaktohen kriteret e reja, u jepet “karta jeshile” sipërmarrjeve

Qeveria ka përcaktuar kriteret e reja që duhet të përmbushin të gjithë të interesuarit që duan të ofrojnë kurse profesionale me qëllim që të lincesohen si qendra të tilla. Në vendimin e marrë në mbledhjen e fundit të qeverisë, për  “ përcaktimin e kritereve dhe procedurave për hapjen, riorganizimin dhe mbylljen e ofruesve publikë të arsimit dhe formimit profesional” thuhet se nisma për hapjen e këtyre qendrave, përpos institucioneve publike në vend, mund të ndërmerret edhe nga  partnerë socialë dhe përfaqësues të komunitetit të biznesit.

Propozimi për hapjen ofruesit publik të arsimit profesional, shkollë e mesme profesionale, si dhe qendër shumëfunksionale, paraqitet pranë ministrisë përgjegjëse për AFP-në, të paktën, një vit përpara fillimit të vitit shkollor në rastin kur kërkohet ndërtesë e re dhe 3 (tre) muaj në rastin kur ka godinë. Pas shqyrtimit të kërkesës, njoftohen kërkuesit me shkresë zyrtare për pranimin apo refuzimin e saj. Por cilat janë kriteret për hapjen e ofruesve publikë të arsimit profesional?

Referuar vendimit në fjalë, ndërtesa dhe mjediset e saj plotësojnë kushtet për sigurimin e jetës dhe të shëndetit, të përcaktuara nga Ministria e Shëndetësisë dhe Mbrojtjes Sociale; Ndërtesa e shkollës/qendrës, reparteve të praktikës profesionale dhe mjediset e saj plotësojnë standardet, sipas legjislacionit në fuqi; duhet të sigurohen, sipas legjislacionit në fuqi,  furnizim me ujë; ngrohje; furnizim me energji elektrike; Të kenë infrastrukturë didaktike e përshtatshme që plotëson standardet, sipas legjislacionit në fuqi; Standardet që lidhen me kurrikulën mësimore të arsimit dhe formimit profesional dhe standardet e kurrikulës mësimore të arsimit të përgjithshëm, që u ofrohet nxënësve në institucionet publike që ofrojnë arsim të mesëm profesional rregullohen sipas legjislacionit në fuqi, të miratuara nga ministritë përkatëse, sipas fushës së përgjegjësisë shtetërore të tyre.

Nga ana tjetër, këto institucione mund të mbyllen kur nuk kanë përmbushur qëllimin për të cilin janë krijuar ose nuk e përmbushin atë; nuk sigurojnë ofertë të përshtatshme për kërkesat e tregut të punës; frekuentimi/regjistrimet është/janë i ulët/të ulëta (në rënie) për tri vite radhazi dhe nuk justifikon mbajtjen e tyre.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.