Bizneset italiane më optimiste për 2023 – Banka e Italisë: Shqetësimi nga inflacioni po zbehet
Opinioni i bizneseve italiane për perspektivat e ekonomisë u përmirësua në tremujorin e parë të 2023 krahasuar me tre muajt e mëparshëm, sipas Bankës së Italisë, pasi pritshmëritë për inflacionin ranë.
Në tre muajt e parë të vitit, përqindja e bizneseve italiane që prisnin kushte më të mira ekonomike u rrit në 14.9% nga 6.3% në tre muajt e mëparshëm, tha Banka e Italisë në vrojtimin e saj tremujor. Përqindja e atyre që presin përkeqësim të kushteve ekonomike pothuajse u përgjysmua në 23.7% nga 47%.
Ministri italian i Ekonomisë Giancarlo Giorgetti tha në mars se perspektiva ishte përmirësuar që nga një rënie tremujore prej 0.1% e produktit të brendshëm bruto në fund të vitit 2022 dhe vendi kishte të ngjarë të shmangte një tremujor të dytë të tkurrjes në fillim të këtij viti. Pritshmëritë janë më pak të zymta falë kërkesës më të fortë dhe rënies së çmimeve të energjisë, sipas anketimit.
Në ndryshim nga tremujori i katërt i 2022, parashikimet e inflacionit u ulën “ndoshta falë rënies së fortë të Indeksit të Çmimeve të Konsumit të parë në fillim të vitit”, shtoi banka qendrore.
Në shkurt inflacioni italian u rishikua lehtësisht poshtë për shkak të rënies së çmimeve të energjisë, por komponentët bazë u përshpejtuan. Pritshmëritë e kompanive për inflacionin e çmimeve të konsumit në 12 muaj ranë në 6.4%, krahasuar me 8.1% në vrojtimin e mëparshëm. Në një horizont dyvjeçar pritet një normë inflacioni prej 5.3%, nga 6.7%.
Problemet për shkak të inflacionit në rritje janë pakësuar dhe pritshmëritë për punësimin në tremujorin e dytë janë pozitive për të gjithë sektorët. Sondazhi u krye midis 24 shkurtit dhe 17 marsit midis bizneseve italiane të industrisë dhe shërbimeve me të paktën 50 punonjës.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.