Blihen 10 mln euro energji për tetorin – KESH finalizon dy tenderë, çmimi mesatar shkon në 98 euro/mWh

Teksa situata hidrike favorizoi prodhimin vendas të energjisë në pjesën e parë të vitit, aktualisht Korporata Elektronergjetike Shqiptare ka nisur importin, me qëllim plotësimin e nevojave konsumatore. 2 procedura tenderuese u mbyllën për gjysmën e parë të muajit tetor, teksa vlera e shpenzuar arrin në rreth 10 mln euro.

Në total u blenë rreth 95 mijë mWh energji, me një çmim mesatar prej rreth 98 euro/mWh. Çmimi është ndjeshëm më i ulët se ai e vitit që shkoi për shkak të rënies së çmimeve në tregjet ndërkombëtare, duke ndikuar në uljen e shpenzimeve për sigurimin e energjisë.

Kjo situatë, e kombinuar me prodhimin e rritur në Kaskadë pasohet me efekte pozitive për Korporatën Elektroenergjetike Shqiptare.

Sipas përllogaritjeve të TV SCAN, shpenzimet e deritanishme për blerje energjie kanë arritur në rreth 44 mln euro, apo 10-fish më pak se vitin që shkoi, duke qenë se viti 2022   fatura arriti në rreth 504 mln euro, me TVSH.

Paralelisht, në gjysmën e parë të vitit, KESH shiti energji për shkak të mbiprodhimit në Kaskadë, duke arritur të arkëtojë rreth 41.5 mln euro.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.