BQK, lehtësi në financimin e fermerëve – Por, kreditimi i bujqësisë në Kosovë përbën vetëm 2.4% të totalit

Banka Qendrore e Kosovës ka bërë një rezyme të projektit që asistohet nga Korporata Financiare Ndërkombëtare për rritjen e financimit për fermerët. Projekti ka një rëndësi të veçantë për faktin se fermerëve do t’u mundësonte qasje më të lehtë në financa, kushte më të favorshme dhe qëndrueshmëri të investimit, për shkak të reduktimit të rrezikut nga produktet e sigurimit bujqësor.

Sipas Guvernatorit të Bankës Qendrore të Kosovës, Ahmet Ismaili, synohet rritja e konkurrencës, qëndrueshmërisë dhe pavarësisë së zhvillimit pa u bërë barrë e ndihmave shtetërore për mbulimin e humbjeve që lidhen me ngjarjet klimatike.

Guvernatori Ismaili, i ka rekomanduar Ministrisë së Bujqësisë, Pylltarisë dhe Zhvillimit Rural, që me rastin e hartimit të politikave të tilla të mundësojë që sigurimet bujqësore të jenë parakushte për fermerët kur përfitojnë grante dhe subvencione, që të sigurohet qëndrueshmëria e investimeve, rendimenteve dhe sektorit në tërësi.

Sipas tij, që kur ka filluar zyrtarisht projekti e deri më tani, kreditimi për sektorin e bujqësisë ka shënuar rritje me 22.8 milionë euro apo 50.7%, në 67.9 milionë euro. Ndërsa nga institucionet e mikrofinancës ka shënuar rritje për 37.1 milionë euro, në një total prej 54.2 milionë euro. Kreditimi në sektorin e bujqësisë të Kosovës përbën vetëm 2.4% të totalit të kredive, apo 1.4% të Prodhimin e Brendshëm Bruto të vendit.

Aktualisht, bujqësia kontribuon me rreth 8% në Prodhimin e Brendshëm Bruto dhe regjistron një normë të kredive me probleme prej 3.8% të totalit.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.