Britania aplikon rregullat e para për Crypto-n – Qëllimi kryesor, vendosja e standardeve të fuqishme

Ministria britanike e Financave planifikon aplikimin e rregullave të forta për sa i përket aseteve të kriptove. Vendimi është marrë pas rënies së FTX, platformës së shkëmbimit të kriptove vitin e kaluar, që shkaktoi miliarda dollarë humbje për miliona njerëz.

Crypto aktualisht mbetet i parregulluar në nivel global, me firmat që duhet të kryejnë kontrolle për të parandaluar pastrimin e parave. Megjithatë, autoriteti i Sjelljes Financiare të Britanisë, tha se më shumë se 80% e aplikuesve për licencë nuk ishin në gjendje të vërtetonin se mund ta bënin këtë si dyhet pasi paratë e pista vazhdojnë të qarkullojnë në sektor, sipas raportimeve të agjencisë së lajmeve Reuters.

Drafti i rregullave, do të sigurojë standarte të qëndrueshme, transparente dhe të drejta, në përputhje me qasjen ndaj financave tradicionale, sipas një deklarate të ministrit britanik të shërbimeve financiare Andrew Griffith.

Ai theksoi se autoritetet mbeten të palëkundura në angazhimin për rritjen e ekonomisë së vendit dhe për mundësimin e ndryshimeve teknologjike – gjë që përfshin dhe teknologjinë e aseteve të kriptove.

Rregullat e reja vijnë pasi rritja e normave të interesit shkaktoi një varg falimentimesh në sektor në vitin 2022, duke ‘fshirë’ 1.4 trilion dollarë nga vlera e tregut të kriptove.

Rënia e tregut tronditi besimin në kriptovaluta, megjithëse interesi për teknologjinë themelore, më së shumti e njohur si ‘blockchain’, për përdorime të tjera si pagesat, mbetet.

Ministria tha se qasja e saj do të zbuste rreziqet më të rëndësishme në këtë sektor. Dështimi i FTX dhe shkëmbimeve të tjera theksoi domosdoshmërinë për rregullim të industrisë për të mbrojtur investitorët. Rregullatorët po përqendrohen në cmimin e “kriptokonglomerateve” të hapura të cilat kombinojnë aktivitete si tregtia, huadhënia dhe kujdestaria nën një ‘çati’.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.