BSH tërheq nga tregu 15 milionë euro, por s’ndalet nënçmimi – Leku vijon forcimin të enjten edhe mbi dollarin, paundin e frangën zvicerane

Nuk ka dhënë asnjë rezultat ndërhyrja e radhës së Bankës së Shqipërisë në tregun valutor përmes së cilës u blenë 15 milionë euro.  Monedha e përbashkët ka vijuar tendencën rënëse edhe të enjten, ndërkohë që leku ka vijuar forcimin edhe në raport me dollarin, paundin e frangën zvicerane.

Ndërhyrja e së mërkurës nga ana Bankës së Shqipërisë në tregun valutor përmes blerjes së 15 milionë eurosh duket se nuk ka dhënë asnjë efekt frenues në nënçmimin e kësaj të fundit, përkundrazi. Monedha europiane ka regjistruar një zbritje të ndejshme të kuotës këtë të enjte duke u blerë me 106.2 lekë dhe duke u shitur me 107.1 lekë. Të mërkurën, ditën e zhvillimit të ankandit nga Banka e Shqipërisë, ajo u ble me 106.46   lekë dhe u shit me 107.15, duke vijuar tendencën nënçmuese.

Gjatë ankandit të së mërkurës, Banka e Shqipërisë bleu në tregun e brendshëm në total 15 milionë euro. Ky është ankandi i dytë për muajin maj, mes 16 ankandeve që Banka e Shqipërisë planifikon të realizojë gjatë gjithë këtij viti. Në të dy ankandet, Banka e Shqipërisë tërhoqi nga tregu një sasi të konsiderueshme prej 32 milionë eurosh. Sipas kalendarit të ndërhyrjeve në tregun e brendshëm të Bankës së Shqipërisë, ajo planifion që deri në fund të këtij viti të blejë 160-220 milionë Euro.

Shifra është mjaft e ulët duke parë sasinë shumë të lartë të eurove në tregun e brendshëm. Vetë banka e Shqipërisë ka pohuar se vetëm prej turizmit, remitancave e eksporteve është krijuar një mbingopje e tregut të brendshëm me më shumë se 400 milionë euro. Me ofertë kaq të lartë të monedhës evropiane në tregun shqiptar, edhe nëse e gjitha shumë prej 220 milionë eurosh do të blihej menjëherë, zor se do të sillte stabilizm domethënës të kursit euro-lek. Pas një tendence forcuese që zgjati vetëm një javë, monedha e përbashkët evropiane i është kthyer nëncmimin në një koh që jemi fare pranë pikut të sezonit turistik, i cili do shtojë më shumë volumin e eurove që qarkullojnë në tregun shqiptar.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.