Bursa e energjisë merr licencën – Pas 2 shtyrjesh, ERE jep miratimin për operimin 5-vjeçar të tregut të energjisë elektrike

Pas 2 shtyrjesh, Enti Rregullator i Energjisë ka licencuar Bursën Shqiptare të Energjisë, në veprimtarinë e operimit të tregut të energjisë elektrike. Licenca do të ketë një kohëzgjatje 5-vjeçare, ndërkohë që vendimi u mor në mbledhjen e fundit të Bordit, pas plotësimit të dokumenteve që ishin domosdoshmëri për funksionimin e saj.

Bursa e energjisë parashikohet të nisë operimet në muajin nëntor për tregun e ditës në avancë, ndërkohë që në muajin janar 2023 parashikohet të nisë tregtimi për tregun e Kosovës dhe bashkimi i të dy tregjeve Shqipëri – Kosovë. Po ashtu, parashikohet që në dhjetor të vitit 2023 të nisë tregtimi i energjisë elektrike brenda të njëjtës ditë për tregun e Shqipërisë dhe dy muaj më pas të bëhet bashkimi i tregjeve brenda të njëjtës ditë për të dy tregjet.

Ngritja e bursës së energjisë nënkupton listimin e prodhuesve të energjisë elektrike, çka do të rrisë konkurrencën si dhe do të lehtësojë blerjen e energjisë nga të gjithë bizneset e liberalizur që sigurojnë vetë sasinë e nevojshme të energjisë.

Ngritja e saj ka tejkaluar çdo afat ligjor, ndërkohë që tashmë funksionimi i këtij instrumenti ka një rëndësi edhe më të veçantë, pasi data 1 janar e këtij viti shënoi daljen në treg të lirë të rreth 7500 bizneseve. Përfaqësuesit e këtyre bizneseve kritikuan nxjerrjen në treg të lirë, pa përmbushur kushtet që duhet të plotësojë tregu, sikurse është bursa energjisë.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.