Parku diellor i Karavastasë, me kredi nga BERZH – Kompania që fitoi ankandin kërkon 28 milionë euro borxh, projekti total shkon në 125 milionë euro

Kompania franceze “Voltalia”, që fitoi ankandin për ndërtimin e parkut fotovoltaik në Karavasta ka kërkuar 28 mln euro kredi, pranë Bankës Evropiane për Rindërtim dhe Zhvillim. Gjithçka është njoftuar nga BERZH, që specifikon se aprovimi për kredinë afatgjatë parashikohet të bëhet në datën 2 nëntor të këtij viti. Në total, projekti ka një vlerë prej 125 mln euro, teksa në korrik të këtj viti kompania njoftoi nisjen e punimeve.

Ndërkaq, Parku fotovoltaik i Karavastasë, që do të prodhojë energji nga dielli, parashikohet të nisë operimet në 30 qershor të vitit 2023. Kjo sipas marrëveshjes përfundimtare të firmosur midis kompanisë Voltalia dhe Ministrisë së Infrastrukturës dhe Energjisë, që u bënë publike, gjatë miratimit të kontratës midis kompanisë dhe Operatorit të Sistemit të Transmetimit, për lidhjen e impiantit me rrjetin e transmetimit të energjisë. Parku fotovoltaik i Karavastasë do të ketë një fuqi të instaluar prej 140 MW, teksa çmimi i ofertuar për blerjen e energjisë që doli nga ankandi është 24.89 euro/MW.

Ky është çmimi m e të cilin shteti shqiptar garanton blerjen e energjisë elektrike për një periudhë 15-vjeçare për 70 MW, ndërkohë që 70 MW të tjerë do të mund të tregtohen nga kompania në treg të lirë. Paralelisht, e njëjta kompani ka fituar edhe ankandin për parkun fotovoltaik të Spitallës, me një fuqi të instaluar prej 100 MW.

Gjithsesi, nisja e prodhimit të energjisë nga ky impiant është më i largët. Ndërtimi i këtyre impianteve është tejet i rëndësishëm në drejtim të diversifikimit të burimeve të prodhimit të energjisë, por edhe uljes së varësisë nga importet, që aktualisht po kushtojnë miliona euro nga paratë publike.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.