Bursat e mbyllin javën në rritje – Volvo humb 11% të vlerës, pasi Geely do të shesë 100 mln aksione
Bursat europiane po qëndrojnë në rritje në sesionin e sotëm dhe pritet të publikojnë edhe fitime javore. Indeksi pan-Europian Stoxx po qëndron në rritje me 0.4%, ndërsa në sesionin e kaluar humbi rreth 0.7% të vlerës, për shkak të rënies së sektorit të naftës dhe gazit.
Gjatë kësaj jave, ndërkohë, ky indeks është rritur me rreth 1.8%. Tregjet janë nxitur nga shenjat për ngadalësimin e indeksit të çmimeve të konsumit dhe indeksin e çmimeve të prodhimit, gjatë tetorit, që rritën shpresat se inflacioni më në fund mund të qëndrojë i ulët.
Përsa i përket korporatave, aksionet e prodhuesit të automjeteve, Volvo ranë me mbi 11% në sesionin e sotëm, pasi kompania mëmë, Geely filloi shitjen e 100 milionë aksioneve të kompanisë suedeze. Kompania kineze Geely Holding Group njoftoi të premten se do të shiste aksione të tjera të Volvo, një lëvizje që ishte në përputhje me strategjinë e saj afatgjatë.
Geely do të vazhdojë të mbajë 78.7% të aksioneve të Volvo, thuhet në deklaratë. Ndërkohë, aksionet e Alphabet kompanisë mëmë të Google, investitorët i kanë parë në mënyrë të favorshme këtë vit, por analistët kanë disa rezerva. Morgan Stanley mendon se aksionet e Alphabet janë të mbivlerësuara, veçanërisht nëse krahasohet me Meta dhe Amazon.
Banka amerikane e investimeve e uli objektivin e saj të çmimit të Alphabet nga 155 dollarë në 150 dollarë. Gjithsesi ky çmim është 11.4% më i lartë, krahasuar me çmimin e aksionit të Alphabet më 15 nëntor.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.