Bursat europiane e nisin javën në rënie – Shqetëson ekonomia kineze, në fokus edhe vizita e Blinken në Pekin

Bursat europiane po qëndrojnë në rënie në sesionin e parë të kësaj jave, pasi investitorët janë të shqetësuar për ngadalësimin e ekonomisë globale, sidomos asaj kineze. Indeksi pan-Europian Stoxx 600 e ka nisur ditën në rënie me 0.5%, ndërsa sektori farmaceutik kryeson humbjet në rënie me 1.7%.

Edhe sektori i naftës dhe gazit është në rënie me rreth 0.8%. Ndërkohë, shumica e tregjeve në rajonin e Azi-Paqësorit kanë publikuar humbe, por Nikkei i Tokios po qëndron në nivelin më të lartë në 33 vitet e fundit. Në fokus të tregjeve do të jetë edhe takimet diplomatike mes SHBA dhe Kinës.

Sekretari amerikan i Shtetit, Antony Blinken, po zhvillon një vizitë zyrtare në Pekin, në përpjekje për të përmirësuar marrëdhëniet mes dy vendeve. Megjithatë, volumi i shkëmbimeve tregtare pritet të jetë i ulët, gjatë ditës së sotme, pasi Wall Street do të qëndrojë pushim, me rastin e një feste kombëtare.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.