Bursat europiane e nisin javën në rritje – Tregjet presin takimet e Rezervës Federale, BQE dhe Bankës së Japonisë

Bursat europiane po qëndrojnë në rritje në sesionin e sotëm, pasi investitorët po përgatitet për një javë shumë të ngjeshur me takimet e bankave qendrore në SHBA, Europë dhe Azi. Indeksi pan-Europian Stoxx 600 e ka nisur ditën në rritje me 0.5%, ndërsa sektori i shërbimeve kryeson fitimet, në rritje me 0.7%. Banka zvicerane UBS po qëndron në rritje me rreth 1%, pasi njoftoi se e ka përfunduar procesin e blerjes së Credit Suisse.

Të mërkurën, në vëmendje të investitorëve do të jetë takimi i Rezervës Federale, ndërsa të enjten do të jetë takimi i Bankës Qendrore Europiane. Sipas analistëve, ekzistojnë 70% mundësi që Rezerva Federale të mos rrisë normën bazë të interesit.

Në anën tjetër, investitorët janë të paqartë në lidhje me vendimet që do të marrë Banka Qendrore Europiane, sepse javën e kaluar presidentja, Christine Lagarde deklaroi se pavarësisht se inflacioni u ngadalësua në 6.1%, normat e interesit do të vazhdojnë të rriten sepse kjo shifër është shumë larg objektivit për një inflacion prej 2%.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.