Bursat europiane i rikthehen fitimeve – Anëtarët e FED sinjalizojnë se shtrëngimi monetar ka përfunduar
Bursat europiane i janë rikthyer fitimeve në sesionin e sotëm, pasi investitorët i kanë mirëpritur komentet e anëtarëve të bordit të Rezervës Federale. Indeksi pan-Europian Stoxx 600 po qëndron në rritje me 0.2%, ndërsa sektori i automjeteve kryeson fitimet, në rritje me 1.2%.
Të martën, Guvernatori i Rezervës Federale, Christopher Waller u shpreh i sigurt se politika monetare aktuale është e mjaftueshme për t’a rikthyer inflacionin nën kontroll. Megjithatë, ai pohoi se inflacioni ishte ende shumë i lartë. Waller tha gjithashtu se Fed mund të fillojë të ulë normat e interesit, nëse inflacioni vazhdon të lehtësohet gjatë tre deri në pesë muajt e ardhshëm.
Investitorët janë pothuajse të sigurt se Rezerva Federale nuk do të ndryshojë normat e interesit në dy takimet e ardhshme, ndërsa tregjet vlerësojnë një probabilitet prej 43% për një ulje të interesave në mars dhe një probabilitet më shumë se 50% për një ulje në maj. Edhe tregjet amerikane dhe ato aziatike patën një tendencë në rritje, pas këtyre komenteve.
Referuar të dhënave të tjera, inflacioni në Spanjë ra në 3.2% me bazë vjetore, gjatë nëntorit, nga 3.5% që ishte në tetor. Megjithatë, investitorët po tregohen të kujdesshëm pasi po presin të dhënat mbi inflacionin për Eurozonën dhe Shtetet e Bashkuara të Amerikës, që do të publikohen më vonë gjatë javës.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.