Shifra rekord gjatë fundjavës së Falenderimeve – Konsumatorët amerikanë shpenzuan “online” rreth $38 mld USD

Uljet drastike në gjithçka, nga produktet e bukurisë dhe lodrat tek pajisjet elektronike gjatë fundjavës së Falënderimeve, i joshën blerësit amerikanë që të shpenzojnë rreth 38 miliardë dollarë në internet, duke sinjalizuar një sezon të fortë blerjesh gjatë festave, edhe pse pasiguria ekonomike po mbizotëron.

Shpenzimet e konsumatorëve amerikanë në internet u rritën me 7.8% gjatë pesë ditëve, nga Dita e Falënderimeve deri në të Hënën Kibernetike, sipas të dhënave të Adobe Analytics, duke tejkaluar pritshmëritë fillestare për një rritje prej 5.4%. Përpara fillimit të sezonit të blerjeve, vlerësuesit e industrisë, duke përfshirë Deloitte dhe shitësit me pakicë si Ëalmart dhe Macy’s paralajmëruan për shpenzime të kujdesshme nga ana e konsumatorëve për shkak të buxheteve të kufizuara si pasojë e inflacionit të lartë.

Më shumë se 200 milionë konsumatorë bënë blerje si në dyqan ashtu edhe në internet gjatë fundjavës së Falenderimeve, njoftoi të martën Federata Kombëtare e Shitjeve me Pakicë, duke përfaqësuar një rritje gati 2% krahasuar me vitin e kaluar dhe duke tejkaluar vlerësimet e shoqatës prej 182 milionë. Analistët shprehen se individët janë bërë më të vetëdijshëm për çmimet këtë sezon.

Megjithatë, rreth gjysma e amerikanëve nuk i shfrytëzuan uljet për të bërë blerje dhe për këtë arsye Federata Kombëtare e Shitjeve me Pakicë i qëndroi parashikimit të saj për rritje 3%-4% të shitjeve me pakicë gjatë sezonit të plotë të festave nëntor-dhjetor, duke thënë se blerësit do të vazhdojnë të kërkojnë ulje më të mëdha. Mesatarisht, konsumatorët shpenzuan 321 dollarë për blerjet e lidhura me pushimet e fundjavës së Falenderimeve, duke përfshirë lodrat, pajisjet elektronike dhe kartat e dhuratave, krahasuar me 325 dollarë vitin e kaluar.

“Mendoj se po shohim një bast nga konsumatorët se do të ketë ende ulje deri në festat e fundvitit, ka optimizëm për festat, është thjesht një model shpenzimi i ndryshëm nga ai që jemi mësuar deri tani”, deklaroi Dave Peacock, CEO i Advantage Solutions, një firmë këshilluese që punon me shitës me pakicë, duke përfshirë Walmart.

Zbritjet e mëdha deri në 31% për pajisjet elektronike dhe 27% për lodrat, por edhe lehtësitë për të bërë blerje të minutës së fundit nga shtëpia, i kanë dhënë shitjeve “online” një avantazh ndaj blerjeve në dyqane. Blerësit online u rritën me 3.1% në 134.2 milionë gjatë fundjavës së Falënderimeve, duke kompensuar një rënie të lehtë të numrit të klientëve që vizituan dyqanet.

Gjatë këtyre uljeve, dyqanet u vizituan nga rreth 121.4 milionë blerës, nga 122.7 milionë në vitin 2022. Referuar Salesforce, e cila nxjerr të dhëna mbi trafikun në internet dhe shpenzimet që rrjedhin përmes shërbimit të saj të tregtisë elektronike Commerce Cloud, blerësit amerikanë shpenzuan në total rreth 70.8 miliardë dollarë, gjatë fundjavës së Falënderimeve, që përfaqëson një rritje prej 4.1% krahasuar me vitin 2022.

Në përpjekje për të manaxhuar buxhetet e tyre të Krishtlindjeve, blerësit po mbështeten gjithashtu te shërbimet “Bli Tani, Paguaj Më vonë” të Klarna apo Affirm, për të shmangur tarifat dhe interesat shtesë që vijnë nga pagesat me kartë krediti. Blerje rekord në rreth 940 milionë dollarë u bënë përmes kësaj metode vetëm të Hënën Kibernetike, duke u rritur me 42.5% nga viti i kaluar dhe duke tejkaluar vlerësimet e Adobe për një rritje prej 18.8%.

Kompania e pagesave, Block vuri në dukje se transaksionet nëpërmjet metodës “Bli Tani, Paguaj Më vonë”, përmes Afterpay u rritën me 19% gjatë fundjavës. Edhe Klarna deklaroi se njohu një rritje prej 29% të blerjeve, gjatë së Premtes së Zezë. Ndërkohë, vetën në të Hënën Kibernetike, shitjet arritën një rekord prej 12.4 miliardë dollarë, duke tejkaluar parashikimet e Adobe për 12 miliardë dollarë.

Lidion Kulla /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.