Bursat europiane tentojnë ringritjen – Investitorët presin takimin e ministrave dhe guvernatorëve të G7-ës

Bursat europiane po qëndrojnë në rritje në sesionin e sotëm, pas disa ditësh me tregti të dobët. Indeksi pan-Europian Stoxx 600 po qëndron në rritje me 0.3%, ndërsa shumica e sektorëve janë në territor pozitiv.

Tregjet po bëjnë bilancet përpara festave të fundvitit, megjithëse takimet ndërkombëtare të zyrtarëve të lartë vazhdojnë, me ministrat e financave dhe guvernatorët e bankave qendrore të G7-ës, që do të takohen ditën e sotme.

Ndërkohë, në rajonin e Azi-Paqësorit, indeksi Nikkei i Tokios u rrit me 1%, pasi Banka e Japonisë i la të pandryshuara normat e interesit, në mbledhjen përmbyllëse të vitit. Ministrat e financave dhe guvernatorët e 7 ekonomive më të industrializuara ë botë do të zhvillojnë një takim virtual, ku në fokus të bisedimeve do të jenë politikat monetare por edhe ndihma për Ukrainën.

Në një lëvizje të pritshme gjerësisht, Banka e Japonisë e mbajti të pandryshuar politikën e saj monetare, me norma të ulëta të interesit. Gjithashtu, banka qendrore nuk bëri asnjë ndryshim në udhëzimet e saj, duke zbehur shpresat e tregtarëve se do të ndryshonte gjuhën, për të sinjalizuar një fund afatshkurtër të normave negative të interesit.

Ndërsa në Europë, anëtari i Bankës Qendrore Europiane, Francois Villeroy de Galhau, tha se normat e interesit duhet të ulen në vitin 2024 dhe se inflacioni duhet të kthehet në objektivin prej 2% deri në vitin 2025. “Ky nuk është vetëm një parashikim, ky është një angazhim”, tha ai.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.