Bursat europiane zgjerojnë humbjet – Investitorët, të shqetësuar për ngadalësimin e ekonomisë globale
Bursat europiane janë hapur në rënie edhe në sesionin e sotëm, pasi besimi i investitorëve vijon të jetë i dobët. Indeksi pan-Europian Stoxx 600 e ka nisur ditën në rënie me 0.4%, ndërsa shumica e sektorëve janë në territor negativ. Sektori i automjeteve dhe ai i teknologjisë kryesojnë humbjet, në rënie me 0.8% dhe 0.7% respektivisht.
Investitorët janë të shqetësuar për ecurinë e ekonomisë dhe për këtë arsye indeksi Stoxx 600 humbi rreth 1% të vlerës në sesionin e kaluar. Ndërkohë, shumica e tregjeve në rajonin e Azi-Paqësorit patën një performancë mikse, pasi investitorët e mirëpritën vendimin e Bankës Qendrore të Kinës për të ulur interesat e kredive 1 dhe 5-vjeçare. Investitorët po presin të dhënat mbi inflacionin në Mbretërinë e Bashkuar, që do të japin një panoramë më të qartë mbi vendimet që do të marrë Banka e Anglisë, më vonë gjatë kësaj jave.
Tregjet presin gjerësisht një tjetër rritje të normës bazë të interesit, e cila do të jetë e 13-a me radhë. Gjithashtu, investitorët po presin edhe të dhënat mbi llogarinë korrente në Eurozonë për muajin prill.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.