Tregu monetar, i qëndrueshëm – Investitorët presin inflacionin në Britani dhe takimin e Bankës së Anglisë

Dollari amerikan po qëndron në rritje të lehtë në sesionin e sotëm, ndërsa një ditë më parë preku nivelin më të lartë në 7 muajt e fundit përballë jenit japonez. Megjithatë, volumi i shkëmbimeve tregtare ka qenë i ulët, pasi Wall Street ishte pushim të hënën, me rastin e një feste kombëtare. Euro vijon të këmbehet në mbi 1.09 përballë dollarit amerikan, ndërsa ka gjetur një mbështetje nga komentet e zyrtarëve të Bankës Qendrore Europiane, të cilët thanë se normat e interesit do të vazhdojnë të rriten, për shkak se inflacioni mund të jetë më i lartë se parashikimet.

Ndërkohë, paundi britanik po këmbehet pranë 1.28 dollarëve, ndërsa investitorët po presin të dhënat mbi inflacionin në Mbretërinë e Bashkuar dhe mbledhjen e Bankës së Anglisë, më vonë gjatë kësaj jave. Tregjet vlerësojnë se banka qendrore do të rrisë normën bazë të interesit edhe me 25 pikë bazë dhe do të jetë rritja e 13 me radhë.

Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 102.5, shumë pranë nivelit më të ulët në 1 muaj. Ndërkohë, në tregun e kriptomonedhave, bitcoin po tregtohet në rreth 26,800 dollarë, ndërsa ethereum po tregtohet në rreth 1730 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.