Nafta, e qëndrueshme pranë 76 USD – Mbështetet nga ulja e interesave të kredive në Kinë
Nafta Brent e Londrës po tregtohet e qëndrueshme në sesionin e sotëm, ndërsa nafta Bruto amerikane po qëndron në rënie me rreth 1%, për shkak se Banka Qendrore e Kinës uli normën bazë të interesit, në përpjekje për të mbështetur ekonominë në ngadalësim. Banka Popullore e Kinës uli interesat e kredive 1-vjeçare dhe 5-vjeçare me 10 pikë bazë, për herë të parë në 10 muajt e fundit, pasi autoritetet po përpiqen të mbështesin ekonominë e dytë më të madhe në botë, e cila ka shfaqur shenja shqetësuese të ngadalësimit.
Nafta Brent e Londrës po tregtohet në rreth 76 dollarë për fuçi, ndërsa nafta Bruto amerikane po tregtohet në rreth 71 dollarë për fuçi. Qeveria kineze u takua javën e kaluar për të diskutuar masat në mbështetje të rritjes ekonomike, pasi vrulli pas pandemisë u zbeh menjëherë.
Gjithashtu, investitorët po presin edhe dëshminë e shefit të Rezervës Federale, Jerome Powell, përpara ligjvënësve amerikanë, i cili mund të japë më tepër detaje në lidhje me normat e interesit. Për sa i përket furnizimit të tregut, eksportet e naftës bruto nga Irani kanë regjistruar rekorde të reja gjatë këtij viti, pavarësisht sanksioneve të Shteteve të Bashkuara të Amerikës.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.