Bursat europiane zgjerojnë humbjet – Ndikohen nga fitimet e korporatave dhe nga të dhënat ekonomike

Bursat europiane po qëndrojnë në rënie në sesionin e sotëm, pasi investitorët po llogarisin ndikimin e krizës në Lindjen e Mesme. Gjithashtu, humori i investitorëve është dobësuar edhe nga fitimet tremujore të korporatave dhe nga të dhënat ekonomike.

Indeksi pan-Europian Stoxx 600 po qëndron në rënie me 1%, ndërsa shumica e sektorëve janë në territor negativ. Sektori i automjeteve realizon humbjet më të mëdha, në rënie me 2.1%, i ndjekur nga bankat dhe shitijet me pakicë, në rënie me 1.5%. Edhe shumica e tregjeve aziatike u përballën me një shitje masive të aksioneve, me bursën e Japonisë, Koresë së Jugut dhe Hong Kongut, që ranë me më shumë se 2%.

E njëjta gjë ndodhi edhe në Ëall Street sesionin e kaluar, pasi yield-i i obligacioneve 10-vjeçare u rrit në 4.9%, niveli më i lartë që nga viti 2007. Referuar të dhënave të tjera, inflacioni në Eurozonë rezultoi në 4.3% për shtatorin, në rënie nga 5.2% që ishte në gusht. Përsa i përket korporatave, aksionet e Renault kanë rënë me rreth 7%, pasi prodhuesi francez i makinave raportoi fitime më të ulta se parashikimet e analistëve për tremujorin e tretë të vitit.

Ndërkohë, edhe aksionet e Nokia janë në rënie me rreth 2%, pasi kompania finlandeze e telekomunikacionit deklaroi se do të shkurtojë rreth 14 mijë vende pune, si pjesë e planit për të reduktuar kostot. Gjithashtu, Nokia raportoi edhe një rënie të fitimeve gjatë tremujorit të tretë të këtij viti.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.