Buxheti, 4 mld lekë shtesë për energjinë – Vendimi: Do i transferohen KESH-it për veprimtarinë operacionale të shoqërisë

Pak ditë përpara mbylljes së vitit, 4 mld lekë janë akorduar nga buxheti i shtetit në programin e mbështetjes së energjinë. Vendimi i qeverisë është miratuar në datën 27 dhjetor, ndërkohë që sipas dokumentit të publikuar në Fletoren Zyrtare fondi do t’i transferohet Korporatës Elektroenergjetike Shqiptare, me qëllim mbulimin me likuiditet të veprimtarisë operacionale të shoqërisë.

Ky fond do të përballohet nga buxheti i vitit 2022, ndërsa vjen në një kohë kur kompania publike e prodhimit të energjisë po gjeneron të ardhura nga shitja e saj. Gjithsesi, shpenzimet për imporitn e energjisë përgjatë vitit kanë qenë të larta, teksa fatura përllogaritet në rreth 350 mln euro, duke vënë në vështirësi financiare kompaninë.

Të dhënat për bilancin vjetor nuk janë ende publike, por 6-mujori i parë i vitit u mbyll me 12 mld lekë humbje për KESH, në ndryshim nga plani i miratuar ku parashikohej fitim në masën 667.7 mln lekë.

Ky rezultat financiar erdhi si pasojë e rritjes me 11 mld lekë të shpenzimeve për blerje energjie, që sipas KESH për periudhën janar – qershor arritën në 21.12 mld lekë, nga 9.98 mld lekë që ishte programi 6-mujor i miratuar. Paralelisht, edhe të ardhurat e realizuara për periudhën 6 – mujore janë më të ulta, në raport me ato të parashikuara.

Më konkretisht KESH raportoi të ardhura nga shitja e energjisë në masën 12.13 mld lekë, nga 14.22 mld lekë që ishte parashikimi.  Ndryshimi më i madh në të ardhura ka ardhur nga shitjet e energjisë për klientët tarfiorë të Furnizuesit të Mundësisë së Fundit. Ndër të tjera, këtu përfshihen bizneset e lidhur në tensionin 20, 10 dhe 6 KV të cilët u nxorrën në tregun e liberalizuar në janar të këtij viti.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.