CEO-t e naftës paralajmërojnë: kriza energjetike e këtij dimri nuk do të jetë asgjë në krahasim me dimrin tjetër!

Politikanët dhe qeveritë në mbarë botën po përgatiten për trazira të mundshme civile, ndërsa shumë vende përballen me rritjen e kostove të energjisë dhe rritjen e inflacionit.

Ekonomia globale po përballet me një sulm nga shumë anë, një luftë në Europë, mungesa të naftës, gazit dhe ushqimit dhe inflacionit të lartë, secila prej të cilave ka përkeqësuar tjetrën.

Shqetësimet janë përqendruar te dimri i ardhshëm, veçanërisht për Europën. Moti i ftohtë, i kombinuar me mungesën e naftës dhe gazit që rrjedh nga sanksionet perëndimore ndaj Rusisë për pushtimin e saj në Ukrainë, kërcënon të shkatërrojë jetët dhe bizneset.

Por, sado shqetësim që ka përpara këtij dimri, është me të vërtetë dimri i vitit 2023 për të cilin njerëzit duhet të shqetësohen, kanë paralajmëruar drejtuesit kryesorë të naftës dhe gazit.

“Ne kemi një dimër të vështirë përpara, dhe më pas kemi një dimër më të vështirë akoma vitin e ardhshëm, sepse prodhimi që është në dispozicion në Europë në gjysmën e parë të 2023 është dukshëm më i vogël se prodhimi që ishte në dispozicion për ne në gjysmën e parë të 2022, “tha Russell Hardy, CEO i tregtarit kryesor të naftës Vitol, gjatë një paneli në konferencën Adipec në Abu Dhabi.

“Pra, pasojat e mungesës së energjisë dhe rrjedhimisht përshkallëzimi i çmimeve, të gjitha gjërat që janë diskutuar këtu në lidhje me koston e jetesës, pritshmërinë e problemeve në të ardhmen, duhet të mendohen qartë në këtë kontekst,” tha ai.

CEO i BP Bernard Looney, duke folur në të njëjtin panel, ra gjithashtu dakord. Çmimet e energjisë “po i afrohen papërballueshmërisë”, me shumë njerëz që tashmë “shpenzojnë 50% të të ardhurave të tyre të disponueshme për energji ose më shumë”, tha ai.

Por përmes një kombinimi të niveleve të larta të ruajtjes së gazit dhe paketave të shpenzimeve qeveritare për të subvencionuar faturat e njerëzve, Europa mund të jetë në gjendje të menaxhojë krizën këtë vit. Të njëjtin shqetësim shprehu edhe shefi ekzekutiv i gjigantit italian të naftës dhe gazit Eni.

Sipas Agjencisë Ndërkombëtare të Energjisë, rezervat e gazit në Europë për këtë dimër janë rreth 90% të mbushura, duke ofruar njëfarë sigurie kundër një mungese të madhe.

Por një pjesë e madhe e saj përbëhet nga gazi rus i importuar në muajt e kaluar, si dhe gazi nga burime të tjera që ishte më i lehtë se zakonisht për t’u blerë pasi importuesi kryesor Kina po blinte më pak për shkak të aktivitetit të saj më të ngadaltë ekonomik.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.