Çmimet e larta të apartamenteve në Ballkanin Perëndimor – Në qendër të Tiranës kushtojnë shtrenjtë, por më lirë se në Zagreb dhe Beograd

Armela Duka/ SCAN

Në vitet e fundit, kryeqyteti i Shqipërisë ka përjetuar një zhvillim të shpejtë urban dhe një rritje të konsiderueshme të çmimeve të apartamenteve.  Çmimet  e larta në qendrën e  kryeqytetit kanë zhvendosur kërkesën konsumatore drejt periferisë. Konkretisht, në të gjithë territorin e Shqipërisë, në 6 muajt e parë të vitit 2023, sipas rezultateve të vrojtimit për tregun e pasurive të paluajtshme dhe indeksit të çmimeve të Bankës së Shqipërisë, 52% e pronave të shitura kanë qenë në periferitë brenda qytetit.  Çmimet e larta kanë detyruar blerësit ti drejtohen institucioneve bankare për të mbuluar koston e  blerjes së një apartamenti. Përkatësisht, sipas indeksit “Fischer” të Bankës së Shqipërisë, rreth 60% e pronave për banim dhe përdorim tregtar të  shitura prej agjentëve janë  blerë me hua bankare. Në 60% të të këtyre rasteve, kredia ka mbuluar deri  në 60% të vlerës së pronës.

Sipas të dhënave të siguruara nga “Numbeo”, databaza globale e kostos së jetesës rezulton se çmimi për metër katror për të blerë një apartament në qendër të Tiranës, është 2,061 EUR ndërsa jashtë qendrës është 52% më lirë ose 1,355 Euro. Theksojmë se këto të dhëna janë përditësuar më datë 15 korrik 2024.

Por, kjo situatë e rritjes së çmimeve ka qenë e ngjashme edhe në kryeqytetet e tjera  të ballkanit. Nëse analizojmë çmimet në qendër të kryeqyteteve të Ballkanit Perëndimor vëmë re se çmimet më të larta janë në Zagreb, Beograd dhe Sarajevë. Përkatësisht çmimet në këto kryeqytete janë 3,876 Euro/m²_, 3,831Euro/m², dhe 2,650 Euro/m². Ndërkohë, çmimet më të ulëta regjistrohen në Prishtinë dhe Shkup ku një metër katror në qendër të qytetit kushton respektivisht 2,055 Euro dhe 1,978 Euro.

Pra, në analizën e shteteve të Ballkanit Perëndimor, vëmë re se shifrat e pozicionojnë Tiranën si një nga qytetet me çmimet më të larta të blerjes së apartamenteve por krahasuar me Zagrebin dhe Beogradin çmimet në kryeqytetin e Shqipërisë janë më të përballueshme. Ndërkohë, jashtë qendrës thuajse në të gjitha qytetet e ballkanit çmimet janë relativisht më të lira. Për shembull, në Prishtinë një apartament mund të blihet me 1,025 Euro/m², në Shkup me 1,400 Euro/m² etj. Në të kundërt, në Zagreb edhe në periferi apo zonat jashtë qendrës çmimet e blerjes së apartamenteve janë 2-fish më të larta.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.