Dështojnë uljet verore të çmimeve në Spanjë – Konsumatorët synojnë vetëm produktet thelbësore

Fillimi i hershëm i sezonit të uljeve verore në Spanjë, që synon rritjen e performancës së shitjeve, po pengohet nga rritja e ndjeshme e kostove të jetesës, e shkaktuar nga inflacioni i lartë i qëndrueshëm në Europë, duke e bërë të vështirë për bizneset të përmbushin objektivat e tyre të shitjeve. Tradicionalisht, sezoni i uljeve verore në Spanjë fillon më 1 korrik të çdo viti. Megjithatë, vitet e fundit, shumë biznese kanë filluar të ofrojnë zbritje më herët për të përmirësuar performancën e shitjeve.

Në një nga zonat e zhurmshme tregtare në qendër të Madridit, dyqanet e vogla dhe të mëdha kanë filluar të postojnë tabela uljesh që nga mesi deri në fund të qershorit. Disa artikuj sezonalë ofrohen me zbritje deri në 50 %, madje disa biznese aplikojnë shitje me zhdoganim. Megjithatë, pavarësisht këtyre përpjekjeve, shumë konsumatorë mbeten të kujdesshëm në blerjet për shkak të ndikimit të inflacionit të lartë.

Sipas një sondazhi të publikuar nga kompania e të dhënave të tregut në internet, StatistA në shkurt të këtij viti, konsumatorët në Spanjë shpenzuan mesatarisht 288 euro gjatë dy sezoneve të shitjeve në 2022, me rreth 19.6 % më pak nga 358 euro në 2019. Një sondazh i fundit i publikuar nga shoqata e konsumatorëve të Spanjës vlerëson se konsumatorët spanjollë do të shpenzojnë vetëm 89 euro për person gjatë sezonit të uljeve verore të këtij viti.

Stili i konsumit “vetëm gjërat thelbësore” shtrihet përtej Spanjës dhe është i përhapur në të gjithë Europën. Analistët theksojnë se kjo lidhet ngushtë me normat e vazhdueshme të larta të inflacionit në Europë. Megjithëse inflacioni në eurozonë ka shfaqur një prirje rënëse, Banka Qendrore Europiane parashikon një normë të lartë të vazhdueshme të inflacionit për një periudhë të zgjatur.

Analistët shprehen se situata është shumë e ndërlikuar dhe nuk ka gjasa që fuqia reale blerëse e banorëve europianë të rritet në një periudhë afatshkurtër. Sipas tyre është e vështirë që ritmi i rritjes së të ardhurave të familjeve nga puna të vazhdojë me normën e inflacionit për shkak të efekteve të raundit të dytë. Për më tepër, sipërmarrjet duhet të kontrollojnë kostot.

Doeina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.