Detyrimet, sa borxhe ka shlyer shoqëria rajonale UKD – Shifrat e paguara në 2023 për energjinë, tatimet, sigurimet e mallrat

Detyrimet e prapambetura janë kthyer në problematikën kryesore të shoqërive rajonale të ujësjellës kanalizmeve në vend. Me argumentin për t’i dhënë zgjidhje kësaj problematike është ndërmarrë dhe një reformë ristrukturimi duke shkrirë 58 ujësjellës e duke krijuar 15 të tilla në rang vend.

Por cila është situata e shlyerjes së detyrimeve të prapambetura të shoqërisë rajonale Ujësjellës Kanalizime Durrës. Referuar të dhënave zyrtare, UKD në fund të vitit 2022 kishte rreth 16 miliardë lekë detyrime të papaguara.

Në zbatim të reformës në Sektorin Ujësjellës Kanalizime, Shoqëria Rajonale Ujësjellës Kanalizime Durrës, duke filluar nga data 1 Janar 2023 ka marrë nëpërmjet procesit të transferimit aktivitetin e Shoqërisë Ujësjellës Kanalizime Durrës, Kavajë, Krujë dhe Rrogozhinë. Nga ana tjetër, vetëm Ujesjellës kanalizime Durrës i shërbentë edhe 4 bashkive të tjera veç Durrësit: Vorës, Kurbinit, Krujës dhe Shijakut.

Ujësjellës Kanalizime Durrës, tashmë në proces likujdimi si pasojë e këtij procesi transferimi, në kuadër të një strategjie më të gjerë të qeverisë për riogranizimin e sektorit të furnizimit me ujë,  përbën një rast disi më specifik.

Shoqëria rajonale Ujesjëllës Kanalizime Durrës ndërkohë në të cilën është transferuar dhe UKD këtë vit ka shlyer një sërë detyrimesh të prambetura nga kompania e vjetër. Këto detyrime janë kryesisht rrjedhojë e kostove të larta të energjisë elektrike, pasi burimet ujore nga të cilat furnizohet janë rreth 50 km larg. Tarifa e shërbimit të furnizimit me ujë janë të pamjaftueshme për të mbuluar koston e operimeve të shoqërisë, duke çuar në akumulim të vazhdueshëm të detyrimeve të papaguara për energjinë elektrike ndaj OSHEE dhe FSHU.

Gjatë vitit 2023 Shoqëria ka paguar ndaj FSHU për energjinë e blerë gjatë këtij viti  vlerën e 160,541,134 lekë. Detyrime të mbartura ndaj FSHU deri në datën 31.12.2022, Shoqëria Rajonale UK Durrës i ka pasur në vlerën 6,204,417,475,00 lekë, nga të cilat ka paguar 63,868,751 lekë. Pra në total gjatë vitit 2023 ka likujduar ndaj FSHU vlerën 224,409,885 Lekë.

Gjatë vitit 2023 Shoqëria Rajonale UK Durrës ka ulur edhe detyrimet e mbartura ndaj Drejtorisë së Përgjithshme të Tatimeve për Sigurimet Shoqërore dhe Shëndetësore të papaguara nga shoqëritë transferuese, duke i likujduar ato në masën 100%, për një vlerë prej 84,958,176 Lekë.

Në vitin 2023, Shoqëria Rajonale e UK Durrës ka arritur të likujdojë edhe vlerën 226,960,039 lekëve nga detyrimet e mbartura të shoqërive transferuese ndaj palëve të treta për materiale, mallra dhe shërbime të kryera, të cilat ishin në vlerën 525,245,628 lekë, duke likujduar kështu rreth 43% e vlerës se detyrimeve të prapambetura për palët e treta.

Sa i përket vitit aktual ndërkohë, Shoqëria rajonale e UK Durrës rezulton se nuk ka krijuar detyrime të reja për sigurimet shoqërore, pagat, dhe aktivitetin tregtar.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.