Dibra, qarku i varfër, me më shumë lindje – Pasuritë e mëdha natyrore s’shpëtojnë ekonominë dibrane, kryeson listën për ikjen e banorëve 

Ndryshimet në Prodhimin e Brendshëm të Bruto të Rajoneve, të publikuara nga Instituti i Statistikave tregojnë se në tre qarqe ekonomia ishte me rënie në vitin 2019, ndërkohë që Dibra kryesonte listën me një rënie prej 3% e ndjekur nga Kukësi me 2.8% dhe Berati me 2%%.

Gjithashtu, Dibra është një nga 3 qarqet me Prodhimin e Brendshëm Bruto për frymë më të ulët në rang vendi. Sipas të dhënave të fundit të disponueshme niveli i këtij treguesi për qarkun verilindor është 421 mijë lekë, një vlerë nën mesataren e vendit që është 579 mijë lekë. Ndërkaq, pavarësisht se është një nga qarqet me burime natyrore më të shumta krahasuar me qarqe të tjerë, Dibra ka nivelin të lartë të migrimit të brendshëm, që sipas ekspertëve vjen si rezultat i thellimit të varfërisë.

Të dhënat zyrtare tregojnë se shkalla e migrimit të brendshëm neto për 1 000 banorë është -49.4, ndërkohë që edhe pjesëmarrja në forcat e punës është nga më të ultat në rang vendi, duke u lënë pas vetëm nga Qarku Lezhë. Shpenzimet mesatare mujore për konsum për njësitë ekonomike familjare në këtë qark arrijnë në 72 048 lekë, treguesi i dytë më i ulët në vend. Por, pavarësisht varfërisë qarku verilindor regjistron indeksin sintetik të fekondimit më të lartë në vend.

Sipas INSTAT, ky indeks është 2.31 fëmijë për grua, ndonëse vendi regjistron një rënie të vazhdueshme, nga 1,48 fëmijë për grua në vitin 2017 në 1,32 në vitin 2021. Kjo bën që ky qark të jetë mbi nivelin e zëvendësimit prej 2.1 fëmijë për grua. Si rezultat qarku regjistron një rritje natyrore positive të popullisë, teksa shkalla natyrore e rritjes fiksohet në 3.4 për 1 000 banorë.

Ola Mitre / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.