Dollari e nis javën në rritje – Mbështetet nga të dhënat mbi punësimin në SHBA për majin

Dollari amerikan po qëndron në rritje në sesionin e parë të kësaj jave, pasi të dhënat pozitive mbi punësimin në SHBA kanë shtuar mundësitë që Rezerva Federale në rrisë normat e interesit në takimin e ardhshëm. Referuar të dhënave zyrtare, ekonomia amerikane krijoi edhe 339 mijë vende të reja pune në maj, ndërsa analistët e anketuar nga Reuters parashikonin 190 mijë vende të reja pune. Pas publikimit të këtyre të dhënave, euro zbriti pranë 1.07 dollarëve, ndërsa në sesionin e së premtes ra me 0.5%.

Përveç numrit të lartë të të punësuarve, edhe norma totale e papunësisë në SHBA qëndroi pranë nivelit më të ulët në 53 vitet e fundit, duke rritur mundësitë që Rezerva Federale të vijojë me politikën monetare shtrënguese në takimin e 13 dhe 14 qershorit.

Ndërkohë, Fondi Monetar Ndërkombëtar njoftoi se pavarësisht rritjes së normave të interesit nga bankat qendrore, nuk është vënë re një ngadalësim domethënës i kreditimit nga bankat. “Ne nuk shohim ende një ngadalësim të konsiderueshëm të kreditimit.

Ka disa shenja, por jo në shkallën që do të çonte në një tërheqje të Rezervës Federale”, deklaroi shefja e FMN-së, Kristalina Georgieva. Ndërkohë, në tregun e kriptomonedhave, bitcoin po tregtohet në rreth 26,700 dollarë, ndërsa ethereum po tregtohet në rreth 1870 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.