Nafta rritet drejt 77 USD për fuçi – Arabia Saudite vendos të ulë vullnetarisht prodhimin me 1 mln fuçi në ditë
Nafta është rritur ndjeshëm në sesionin e sotëm, pas vendimit të Arabisë Saudite për të ulur prodhimin edhe me 1 milion fuçi naftë në ditë. Në takimin e së dielës. Organizata e Vendeve Eksportuese të Naftës dhe aleatët e tjerë me në krye Rusinë, që ndryshe njihen si OPEC+, nuk ndryshuan politikat e prodhimit për pjesën e mbetur të vitit.
Por, eksportuesi më i madh i naftës në botë, Arabia Saudite njoftoi se do të ulë më tej kuotat e prodhimin në mënyrë vullnetare dhe vendimi do të hyrë në fuqi duke filluar nga korriku. Në këtë mënyrë, prodhimi i naftës nga Mbretëria do të bjerë në 9 milionë fuçi naftë në ditë, nga rreth 10 milionë që ishte në maj.
Të dyja kontratat u rritën me më shumë se 2% në sesionin aziatik. Nafta Brent e Londrës po tregtohet në mbi 77 dollarë për fuçi, ndërsa nafta Bruto amerikane po tregtohet në rreth 73 dollarë për fuçi. OPEC+ prodhon rreth 40% të naftës në botë dhe vendimet e këtij grupimi kanë efekt të menjëhershëm në tregje.
Ndërkohë, në takimin e 3 prillit, OPEC+ vendosi të ulë prodhimin me 1.16 milionë fuçi naftë në ditë, duke e çuar totalin e reduktimit në 3.66 milionë fuçi naftë në ditë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.