Ecuria e konsumit në qarqe – Familjet me kryefamiljar me arsim të lartë shpenzojnë më shumë

Rritja e çmimeve, pandemia por gjithashtu dhe rritja e pagave së fundmi, kanë ndikuar në strukturën e shpenzimeve për konsum të Njësive Ekonomike Familjare në Shqipëri, e për rrjedhojë kanë ndryshuar.

Sipas të dhënave të fundit të Vjetarit Statistikor, rritja më e lartë e shpenzimeve për konsum është regjistruar në qarkun Elbasan dhe Vlorë, përkatësisht 8,3 dhe 7,7 përqind. Ndërsa rritja më e ulët të shpenzimeve të konsumit është regjistruar në qarkun Tiranë, me 1,0%.

Rritja më e lartë e peshës së shpenzimeve për grupet e pijeve është regjistruar në qarkun Fier me 3,4 pikë përqindje, ndërkohë ulja më e theksuar është regjistruar në qarkun Vlorë, me -5,6 pikë përqindje.

Duke ju referuar të njëjtave të dhëna, shpenzimet mesatare mujore për konsum sipas qarqeve dhe nivelit të arsimit të kryefamiljarit, vihet re që shpenzimet më të larta janë regjistruar në kategorinë e kryefamiljarëve me arsim të lartë apo pasuniversitar. Më pas vijohet me kategorinë e të arsimuarëve në shkolla të mesme të përgjithshme ose profesionale.

Vlerat më të larta të shpenzimeve për konsum për kategorinë e familjeve me arsim të lartë dhe për kategorinë e të arsimuarëve në shkolla të mesme të përgjithsme ose profesionale janë regjistruar në qarqet Korçë dhe Tiranë.

Shpërndarja e familjeve sipas nivelit të arsimit të kryefamiljarit dhe shpenzimeve mesatare mujore paraqet tendenca të ndryshme përqendrimi në qarqe.

Diamila Leka / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.