Ekonomia shqiptare u rrit me 3,23% – 3-mujori i dytë/ Ndërtimi dhe pasuritë e paluajtshme, ndikimin më të madh
Ekonomia shqiptare ka performuar pozitivisht përgjatë periudhës Prill- Qershor 2023, duke shënuar një rritje me 3.23% në raport me të njëjtën periudhë të një viti më parë. Referuar shifrave të INSTAT, kontribut kryesor në rritjen e Produktit të Brendshëm Bruto (P.B.B) ka dhënë Ndërtimi me +1,43 pikë përqindje dhe Aktivitete të pasurive të paluajtshme me +0,72 pikë përqindje.
Po ashtu Administrata publike, Arsimi dhe Shëndetësia kanë ndikuar me +0,66 pikë përqindje, Arte, argëtim dhe çlodhje; aktivitete të tjera shërbimi me 0,26 pikë përqindje, Informacioni dhe Komunikacioni me +0,26 pikë përqindje, Tregti, Transport, Akomodim dhe Shërbim ushqimor me +0,19 pikë përqindje, Aktivitete Financiare dhe të Sigurimit me +0,09 pikë përqindje.
Negativisht kontribuoi grupi: Industri, Energji dhe Uji me -0,31 pikë përqindje, Aktivitete profesionale dhe Shërbime administrative me -0,27 pikë përqindje, Bujqësi, Pyje dhe Peshkim me -0,03 pikë përqindje. Sa i përket ndryshimeve në krahasim me tremujorin paraardhës, treguesi i Produktit të Brendshëm Bruto i përshtatur sezonalisht vlerësohet me rënie prej 0,44 %.
Referuar komponentët kryesorë të PBB–së me metodën e shpenzimeve, për tremujorin e dytë të vitit 2023, krahasuar me tremujorin e dytë , duket se Konsumi final i popullatës, i cili përbën peshën kryesore të shpenzimeve në ekonomi u rrit me 4,03 %. Konsumi final i qeverisë u shfaq me një rritje prej 9,29 %. Komponenti i Formimit bruto të kapitalit fiks u rrit me 11,05 %. Eksportet e mallrave dhe shërbimeve u ulën me 1,48 %, ndërsa Importet e mallrave dhe shërbimeve u rritën me 2,42 %.
Qeveria shqiptare parashikon që ekonomia këtë vit të rritet me 3.7 për qind, ndërsa BERZH pak ditë më parë mbajti të pa ndryshuar parashikimin në 2.5 për qind.
Elisabeta Dosku/ SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.