Industria dominohet nga nafta, hekuri dhe kromi – Vlera për 2022 arriti 108.6 mld lekë. Këpucët dhe pijet joalkoolike kryesojnë sasinë

Industria shqiptare dominohet nga nafta, hekuri dhe kromi për nga vlera, me një total prej 108.6 mld lekë për vitin 2022, dhe nga këpucët e pijet joalkoolike për nga sasia. Instituti i Statistikave ka publikuar për herë të parë të dhënat e Anketës së Produkteve Industriale, duke dhënë një panoramë mbi ecurinë e produkteve industriale të prodhuara në vendin tonë. Sipas të dhënave në vlerë industria kryesohet nga prodhimi i naftës, që për vitin 2022 ka shënuar rritje.

Në total, vitin që shkoi është prodhuar 902 064 ton naftë nga 697 662 ton të prodhuar në vitin 2021, teksa vlera e shitjeve për këtë produkt ishte rreth 44.9 mld lekë apo 10.7 mld lekë më shumë se viti 2021, duke u rritur me 31,2 %. Rritje pësoi edhe prodhimi i hekurit, duke arritur në rreth 809 mijë tonë, n ga 774 mijë ton, që ishte në 2021.

Në vlerë produkti i hekurit u rrit me 4.3%, duke arritur në 32.7 mld lekë. Ndërkaq, sa i takon kromit, gjatë vitit 2022 është prodhuar 1.399.017 tonë xeherorë dhe koncentrate të kromit nga 1.068.729 tonë të prodhuar në vitin 2021. Rrija në vlerë e këtij produkti arrin në 38.2% gjatë vitit që shkoi, me një total prej gati 31 mld lekë.

E ndarë sipas aktiviteteve ekonomike, lista dominohet nga metalurgjia që zë 14,7 % të vlerës së shitjeve, e ndjekur nga përpunimi i produkteve ushqimore me 11,5 % të shitjeve gjithsej dhe nga nxjerrja e naftës bruto që zuri 11,2 % të shitjeve gjithsej.

Vrojtimi mbi produktet industriale kryhet me frekuencë vjetore pranë ndërmarrjeve të industrisë nxjerrëse dhe përpunuese, ndërkohë që statistikat shërbejnë për të kryer analiza të detajuara të produkteve industriale të prodhuara në vend.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.