Si përfitojnë bizneset nga Fondi Social i Punësimit? – Në listëpritje 9 mijë individë, në dy vitet e fundit janë punësuar vetëm 50

Ministria e Financave do të vërë në funksion Fondin Social të Punësimit, i cili parashikon përfitime dhe subvencione për punëdhënësit që punësojnë individë me aftësi të kufizuara. Pak ditë më parë bizneset eksportuese kërkuan nga Ministria e Financave që për shkak të situatës në të cilën ndodhen, të pezullohet zbatimi i ligjit të vitit 2019, i cili i detyron eksportuesit që 1 në 25 punonjës të punësuar të jetë nga kjo kategori, ose në të kundërt paguajnë pagën minimale dhe kontributet.

Ndërsa nga 1 janar 2024 bëhen efektive ndryshimet ligjore, sipas të cilave kriteri është 1 person me aftësi të kufizuar në 25 punonjësit e parë dhe 1 për çdo 50 punonjës të tjerë të ndërmarrjes. Sipas eksportuesve ky detyrim ka rritur kostot e ndërmarrjeve me 8 për qind, pa marrë në konsideratë investimet që duhet të bëjnë për të krijuar kushte të përshtatshme pune. Kostoja për një biznes me 200 punonjës llogaritet në 18 mijë euro.

Zv.ministrja e Financave,  Olta Manjani ka zhvilluar një takim me një përfaqësi eksportuesish, të cilëve u ka sqaruar se me vënien në funksion të Fondit Social të Punësimit, i cili do të jetë i dedikuar vetëm për këtë kategori, kontributi i dhënë do t’iu kthehet nëpërmjet programeve, që të kenë mundësi të plotësojnë këto kuota.

Ky fond krijohet nga kontributet e derdhura nga punëdhënësit, të cilët nuk punësojnë numrin e përcaktuar të personave me aftësi të kufizuara; financime dhe grante; fondet e përfituara nga marrëveshjet ndërmjet Republikës së Shqipërisë, Këshillit të Ministrave dhe donatorëve të ndryshëm; Buxheti i shtetit.

Në total janë 9,000 persona me aftësi të kufizuara që pritet të punësohen,  nga të cilët rreth 3,600 do të punësohen në institucione publike dhe 5,400 në sektorin privat. Programet synojnë punësimin, vetëpunësimin, rehabilitimin për punë, aftësimin dhe riaftësimin profesional, orientimin dhe këshillimin për punësim, shërbime mbështetëse, rikonstruksion dhe përshtatje të vendit të punës të personave me aftësi të kufizuar, programe riintegrimi social, etj. Sipas të dhënave të Agjencisë kombëtare për Punësim dhe Aftësi, gjatë vitit 2021 janë punësuar 32 persona me aftësi të kufizuara dhe në vitin 2022 vetëm 18.

Elisabeta Dosku/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.