BSH tërheq miliona euro nga tregu, ndikimi i papërfillshëm – Publikohet raporti për ndërhyrjet në tregun valutor gjatë 3-mujorit të dytë 2023

Banka e Shqipërisë ka ndërmarrë ndërhyrje shumë më energjike në kërkim të pakësimit të eurove që qarkullojnë në treg, megjithëse me rezultate modeste. Ajo ka publikuar rezultatet e ndërhyrjeve të deritanishme dhe ato që ka parashikuar në muajt e mbetur të vitit, përmes të cilave synohet të tërhiqen nga tregu të paktën rreth 300 milionë euro. Në raportin e ndërhyrjeve në tregun e brendshëm, gjatë 3-mujorit të dytë të vitit 2023, Banka e Shqipërisë ka zhvilluar 6 ankande për blerjen e valutës.

Pjesëmarrja e bankave ka qenë mjaft e lartë dhe shumat e blera në cdo ankand ka qenë mbi 14 mln euro në të gjithë ankandet me përjashtim të atij të muajit prill ku blenë vetëm 9-10 mln euro dhe mungoi oferta në raundin e dytë. Përfshirë ankandet e muajit korrik, shuma totale e blerë në 10 ankande gjatë vitit 2023 është 150.20 milionë euro dhe kanë mbetur edhe 6 ankande për t’u zhvilluar.

Ndërkaq, vendimi për rritjen e kuotave të blerjes u vu në zbatim që në ankandin e gushtit, kur dyfishoi në 18 milionë euro shumën e blerë, nga 9 milionë sipas planfikimeve të mëparëshme.

Ndërkohë që ka pasur edhe ndërhyrje të tjera për të ulur volumin e eurove në tregun vendas. Banka e Shqipërisë njofton se në fillim të muajit qershor, duke vënë re shpejtësinë e rritur të kursit të këmbimit deri në 4-6%  kundrejt dy dhe 3 javëve më parë si dhe mungesën e kërkesave të valutës edhe pas ankandit të Bankës së Shqipërisë së datës 7 qershor, BSH-ja ka vendosur të ndërhyjë në tregun valutor me objektiv shmangien e çrregullimeve, duke blerë 5 mln euro nga bankat e nivelit të dytë.

Nga ana tjetër, gjatë tremujorit të dytë të vitit 2023, Ministria e Financave ka maturuar marrëveshjen SWAP për 5.7 miliardë lekë pas maturimit për 8.94 miliardë lekë, apo afërisht 85 milionë euro, në tremujorin e parë.  Një transaksion SWAP është konvertimi i një monedhe me një tjetër monedhë në një moment të caktuar kohe, me marrëveshje për të rikonvertuar atë përsëri në monedhën origjinale në një kohë të caktuar në të ardhmen.

Normat e të dy shkëmbimeve vendosen paraprakisht. Banka e Shqipërisë bën me dije marrëveshja SWAP e radhës është maturuar në 18 shtator me vlerë 50 milionë euro, ndërkohë që dy të tjerat për këtë vit parashikohen më 20 tetor dhe 17 nëntor, me vlera përkatësisht 40 milionë euro dhe 45 milionë euro. Gjatë tremujorit janë blerë edhe 4.47 milionë euro nga programi IPA. Gjithësesi, me gjithë shtimin e ndërhyrjeve, ajo që mund të thihet deri tani me siguri është se efektet e tyre kanë qenë modeste duke parë që monedha e përbashkët evropiane vijon të gjendet nën presione të forta nëncmuese në raport me lekun.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.