Eksportet bujqësore, në sfidë me standardet e cilësinë – Prodhuesit shqiptarë do të asistohen për plotësuar kriteret e tregjeve globale

Prodhuesit shqiptarë do të asistohen me qëllim që të përmbushin standardet dhe cilësinë e kërkuar nga tregjet globale, siç janë vendet e Bashkimit Europian, SHBA dhe Kina, në mënyrë që të mos përballen me refuzime të produkteve në kufi, si dhe të zgjerojnë hartën e eksporteve.  Disa nga problematikat e hasura deri më tani, do të hyjnë në rrugën e zgjidhjes përmes “Programit Global të Cilësisë dhe Standardeve (GQSP), i cili është shtirë edhe në Shqipëri, dhe po zbatohet nga Organizata e Kombeve të Bashkuara për Zhvillim Industrial(UNIDO).

Ky program ndihmon prodhuesit e vegjël dhe të mesëm që të rrisin cilësinë e produkteve të tyre, të përshtaten me kërkesat e tregjeve ndërkombëtare dhe të mund të përfitojnë më shumë të ardhura.

Programi financohet nga qeveria zvicerane, përmes SECO. Zv. Ambasadori i Zvicrës në Shqipëri, theksoi se sektori bujqësor në Shqipëri ka shumë potencial i cili duhet shfrytëzuar përmes rritjes së cilësisë dhe standardeve.

Ndërsa për Ministrinë e Bujqësisë, analiza e përputhshmërisë së standardeve është shumë e rëndësishme për politikat publike në vijim.

Nga analiza e pajtueshmërisë së standardeve të kryer nga UNIDO, sa i takon refuzimeve në kufi, rezulton se gjatë periudhës 2010-2020 më shumë se gjysma e pjesës totale të refuzimeve , afro 58 për qind ka qenë nga tregu i BE, ndërsa Kina përbën 31 për qind dhe SHBA 11 për qind.

 

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.