Eksportuesit francezë shohin vetëm humbje të kufizuara të tregut nga sanksionet ruse!

11 paketat e para të sanksioneve ekonomike të Bashkimit Europian kundër Rusisë kanë rezultuar në “humbje të kufizuar të tregut” për 145,000 eksportuesit e Francës, sipas një instituti ndërkombëtar të ekonomisë.

Qendra e Francës për Studime të Perspektivës dhe Informacionit Ndërkombëtar (Cepii), e cila ndodhet brenda Zyrës së Kryeministrit, tha të hënën se të gjitha produktet që i nënshtrohen sanksioneve ndaj Rusisë “korrespondojnë me më pak se 1% të vlerës së eksporteve franceze në vitin 2021 (0.8 %), ose rreth 4 miliardë euro”.

Eksportuesit francezë po ndiejnë efektet e sanksioneve në lidhje me luftën në shkallë të gjerë të Rusisë në Ukrainë, e nisur në shkurt 2022, kryesisht në tre sektorë: pajisjet e transportit (përfshirë aeronautikën), kimikatet dhe makineritë.

Nga 2,436 kompanitë franceze të prekura nga kufizimet në eksportet në Rusi, 809 janë të specializuara në makineri, 554 në kimikate dhe 206 në transport.

Për sa i përket vlerës, vetëm kompanitë e transportit u është dashur të thithin pothuajse gjysmën e 4 miliardë humbjeve të shkaktuara në Francë si rezultat i sanksioneve europiane.

Por pasojat ekonomike të këtyre masave hakmarrëse janë zbutur nga “një devijimi i tregtisë drejt vendeve fqinje të Rusisë”, sipas ekonomistëve të Cepii Charlotte Emlinger dhe Kevin Lefebvre.

“Ndërsa eksportet franceze në Rusi ranë me 52% midis 2021 dhe 2022, ato në Kazakistan, Armeni dhe Kirgistan u rritën përkatësisht me 85%, 62% dhe 44%”, theksojnë ata.

Këto shifra “vënë në dyshim efektivitetin e sanksioneve tregtare” nga Bashkimi Evropian, dy javë pasi Komisioni Europian propozoi një paketë të 12-të sanksionesh të lidhura me luftën në Ukrainë.

Autorët e konsiderojnë të mundshme që Kazakistani, Armenia dhe Kirgistani “do ta rieksportin këtë tepricë të produkteve në Rusi, duke i mundësuar asaj të ruajë aksesin në teknologjitë evropiane” pavarësisht sanksioneve që synojnë t’i heqin Moskës këtë akses.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.