Ekzekutivi i BE-së propozon afrimin e Ukrainës drejt anëtarësimit në bllok mes luftës me Rusinë!

Zyrtarët e lartë të Bashkimit Evuopian rekomanduan të mërkurën që Ukraina të ftohet të fillojë bisedimet e anëtarësimit sapo të përmbushë kushtet përfundimtare, duke e çuar Kievin një hap më afër qëllimit të tij kryesor strategjik, edhe pse lufton për të zmbrapsur pushtimin e Rusisë.

“Komisioni rekomandon që Këshilli (BE) të hapë negociatat e pranimit me Ukrainën,” tha Komisioni Europian me qendër në Bruksel.

Ai shtoi se bisedimet duhet të nisin zyrtarisht pasi Kievi të plotësojë kushtet e mbetura në lidhje me frenimin e korrupsionit, miratimin e një ligji për lobimin në përputhje me standardet e BE dhe forcimin e masave mbrojtëse të pakicave kombëtare.

Rekomandimi është një moment historik i rëndësishëm në rrugën e Kievit drejt integrimit perëndimor dhe një lojë gjeopolitike për BE-në pasi Ukraina po lufton kundër një pushtimi rus në shkallë të gjerë që nga shkurti 2022.

Krerët e BE pritet të vendosin nëse do të pranojnë rekomandimin e Komisionit në një samit në dhjetor. Çdo vendim i tillë kërkon unanimitet të 27 anëtarëve të bllokut, me Hungarinë që shihet si pengesa kryesore e mundshme.

“Ukraina vazhdon të përballet me vështirësi dhe tragjedi të jashtëzakonshme të provokuara nga lufta agresioni e Rusisë”, tha presidentja e Komisionit Europian, Ursula von der Leyen. “E megjithatë, ukrainasit po e reformojnë thellësisht vendin e tyre, edhe pse po bëjnë një luftë që është ekzistenciale për ta”.

Zëvendëskryeministrja e Ukrainës Olha Stefanishyna tha në reagim se Kievi do të vazhdojë reformat e tij. Von der Leyen tha se Komisioni i saj do të rivlerësojë progresin në kushtet marsin e ardhshëm.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.