Euro dhe Paundi bllokojnë kanalizimet! – Autoritetet ukrainase kanë mbledhur rreth 70 mijë euro deri më tani!
Në qytezën e Lanovtsi – në rajonin e Ternopil në perëndim të Ukrainës – i tërë rrjeti i kanalizimeve të ujërave të zeza është bllokuar, aq sa u desh ndërhyrja e një skuadre të specializuar hidraulikësh.
Bllokimi u shkaktua nga pako me kartmonedha euro dhe paundësh. Mendohet se dikush i ka hedhur qëllimisht për t’i zhdukur.
Kryebashkiaku i qytezës që publikoi videon në rrjetet sociale u shpreh se deri tani janë mbledhur 70 mijë euro. Mbetet ende një mister arsyeja për të cilën persona akoma të paidentifikuar kanë vendosur të heqin dorë nga një shumë kaq e madhe në një mënyrë kaq të cuditshme.
Ndër të tjera shuma e saktë e parave nuk është verifikuar ende pasi është marrë vetëm sasia e parave që shkaktoi bllokimin, por shuma të tjera parash janë marrë me vete nga flukset e tubave shkarkues.
Kryebashkiaku i qytezës i bëri apel banorëve që në vend se të shkatërrojnë kartmonedhat t’i dhurojnë ato për forcat e armatosura ukrainase.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.