Euro dhe paundi nuk ndalin “vrullin” – BQE dhe Banka e Anglisë, politikë më agresive se FED

Dollari amerikan po qëndron në rënie edhe në sesionin e sotëm dhe po tregtohet në nivelin më të ulët në 2 muaj e gjysëm, pasi investitorët besojnë gjerësisht se Rezerva Federale i ka dhënë fund ciklit të rritjes së interesave dhe shumë shpejt mund të fillojë ulja e tyre.

Në anën tjetër, paundi britanik është ngjitur në nivelin më të lartë në 10 javën e fundit përballë dollarit, pasi guvernatori i Bankës së Anglisë, Andrew Bailey, ritheksoi se qëndrimi në lidhje me normat e interesit nuk ka ndryshuar.

Bailey deklaroi përpara Komitetit të Thesarit të parlamentit britanik se inflacioni ishte në rrugën e duhur për t’u rikthyer në objektivin prej 2%, por kishte rreziqe që rritja e çmimeve mund të ngecë në nivele të larta.

Bailey shtoi se është ende shumë herët për të menduar uljen e normave të interesit. Në të njëjtën seancë, Catherine Mann, një nga anëtaret më të ashpra të Komitetit të Politikës Monetare të Bankës së Anglisë, deklaroi se ajo favorizon shtrëngimin e mëtejshëm të politikës monetare për të siguruar kthimin e inflacionit në objektiv. Këto komente bënë që paundi britanik të rritet në mbi 1.25 në raport me dollarin amerikan, duke prekur nivelin më të lartë që nga 6 shtatori.

Edhe euro është forcuar në raport me monedhën e gjelbër dhe po tregtohet në rreth 1.095, niveli më i lartë që nga 15 gushti. Euro është forcuar nga pritshmëritë që Banka Qendrore Evropiane po funksionon me një hap vonesë krahasuar me Rezervën Federale, ndërsa do t’i mbajë normat e interesit të larta më gjatë se banka qendrore amerikane.

Gjithashtu, euro gjeti një mbështetje nga vendimi i Agjencisë së Vlerësimit të Kreditit, Moody’s, që përmirësoi perspektivën “Baa3” për vlerësimin sovran të Italisë në të qëndrueshme nga negative që ishte më parë dhe përmirësoi vlerësimin e Portugalisë me dy shkallë në “A3”.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.