Nafta ndal rritjen 2-ditore – Fokusi rikthehet te ngadalësimi i kërkesës në Kinë
Nafta po qëndron në rënie të lehtë në sesionin e sotëm, për shkak se në treg është rikthyer sërish shqetësimi për ngadalësimin e ekonomisë globale, që për rrjedhojë do të dëmtojë edhe kërkesën për naftë. por, humbjet po kufizohen nga perspektiva se OPEC dhe aleatët e tjerë mund të vijojnë me marrëveshjen për uljen e prodhimit edhe në vitin 2024.
Nafta Brent e Londrës po tregtohet në rreth 82 dollarë për fuçi, ndërsa nafta Bruto amerikane po tregtohet në rreth 77 dollarë për fuçi. të dyja kontratat u rritën me rreth 2% të hënën, pasi 3 burime brenda OPEC+ deklaruan për reuters se grupi i vendeve prodhuese do të konsiderojë uljen e prodhimit edhe gjatë vitit të ardhshëm. Organizata e Vendeve Eksportuese të Naftës dhe aleatët e tjerë, me në krye Rusinë, do të takohen më 26 nëntor për të diskutuar mbi politikat e prodhimit.
Tregu i naftës ka rënë me pothuajse 20% që nga fundi i shtatorit, pasi prodhimi i naftës bruto në SHBA, që është prodhuesi kryesor në botë, po qëndron në nivele rekord, në një kohë që tregu është i shqetësuar për ngadalësimin e kërkesës, veçanërisht nga Kina, importuesi numër 1 i naftës në botë.
Tregtarët po shohin për shenja të rënies së kërkesës nga një recesion i mundshëm në SHBA, gjatë vitit 2024. Ndërkohë, investitorët po presin edhe të dhënat nga Instituti Amerikan i Naftës mbi rezervat për javën e kaluar, që do të publikohen më vonë gjatë ditës së sotme, ndërsa të mërkurën publikohet raporti zyrtar nga Administrata për Informimin mbi Energjinë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.