Euro i rikthehet ritmeve të zhvlerësimit të verës – Të enjten u këmbye me 105.78 lekë. Bashkë me të, bien edhe valutat e tjera

Monedha e përbashkët europiane ka vijuar edhe të enjten rënien e fortë të nisur që në ditët e fundit të shtatorit duke u këmbyer me 105.78 lekë, nga 105.99 lekë të mërkurën. Bie në sy se gjatë së enjtes në rënie të fortë janë të gjitha valutat e huaja, kursi i të cilave ndikohet në masë të madhë nga ecuria e lekut në raport me euron, duke qenë se merret si referencë edhe për caktimin e çmimit të tyre.

Nënçmim kaq të fortë të monedhës së përbashkët europiane nuk hasnim që prej muajit gusht, kur edhe flukset e valutës në vend ishin shumë të larta për shkak të turizmit, remitancave, si dhe tregut të pasurive të paluajtshme.

Ndërkaq, në daljen e fundit para mediave, Guvernatori Gent Sejko, theksoi se Banka e Shqipërisë ka përsëritur se nuk ka ndër mend të ndërhyrjë në stabilimin e kursit të këmbimit, përtej përcaktimeve të bëra në kalendarin e ndërhyrjeve, që këtë verë parashikon rritjen e blerjeve të monedhës së përbashkët evropiane deri në 300 milionë euro deri në fund të vitit.

Normalisht regjimi i kursit të këmbimit është i lirë. Pra, për sa kohë që kursi i këmbimit ka një sjellje normale, që zhvillohet sipas kritereve të  tregut dhe jo kushteve spekulative, ne nuk kemi në plan të ndërhyjmë. Edhe një herë theksoj që një kurs këmbimi jo vetëm i stabilizuar por një kurs këmbimi i fortë i lekut kundrejt monedhave të huaja, kryesisht euros, ndihmon në mbajtjen e çmimeve në kontroll pra në rritjen e fuqisë blerëse së popullatës dhe në mbajtjen në kontroll të presioneve inflacioniste. Objektivi ynë kryesor është inflacioni por jo vetëm. Natyrisht që nëse kursi i këmbimit ndihmon në mbajtjen e çmimeve në kontroll, Banka Qendrore nuk ka arsye se pse të ndërhyjë në kursin e këmbimit.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.