Euro “merr në qafe” edhe valutat e tjera – Trajektore të njëjta rënëse në Shqipëri edhe Dollari, Paundi dhe Franga zvicerane
Te gjitha valutat kryesore po shfaqin në Shqipëri të njëjtin ecuri nënçmuese të monedhës së përbashkët evropiane. Dollari amerikan shënoi vlerën më të ulët mesatare në muajin korrik, prej 93.4 lekësh, për t’u rritur në 100.0 lekë në muajin shtator.
Në tre javët e para të tetorit, kursi ndaj dollarit është shfaqur i qëndrueshëm, me një mesatare prej 100.3 lekësh. Mbiçmimi i lekut ndaj dollarit amerikan në këto tre javë ka rënë në 15.9%, nga 19.0% që ishte në korrik. Tendenca vijon e njëjtë edhe për gjysmën e parë të nëntorit.
Në mes të muajit, kursi mesatar i këmimit të monedhës së përbashkët evropiane ka rënë nën kuotën e 104 lekëvë. Ndërkohë që dollari amerikan gjendet në mes të nëntorit në nivelin 95.82 lekë, në rënie të forta nga javët e para të teorit, kur qëndronte në vlerën mesatare prej 100.3 lekësh.
Trajektoret janë thuajse identike për Paundin Britanik, Jenin Japonez, Frangën Zvicerane, dollarin kanadez, apo atë australian. Shkak i këtyre trajektoreve thuajse identike është fakti që valutat e tjera në shqipëri kuotohen duke pasur si referencë monedhën e përbashkët evropiane.
Megjithatë, në terma të përgjithshëm, kursi i këmbimit të lekut ndaj euros është shfaqur i qëndrueshëm dhe tregu valutor i stabilizuar. Luhatshmëria dhe pasiguria e shtuar që karakterizuan muajin korrik janë reduktuar dhe kursi i këmbimit kundrejt euros është luhatur në një interval gjithnjë e më të ngushtë gjatë periudhës gusht – tetor. Leku vijon të jetë i mbiçmuar në terma vjetorë, por raportet e kërkesës dhe ofertës shfaqen të stabilizuara pranë niveleve aktuale të kursit.
Prej muajit gusht, presionet mbiçmuese mbi monedhën vendase janë lehtësuar. Mbiçmimi i shpejtë i lekut gjatë muajit korrik u shoqërua edhe me rritje të luhatshmërisë dhe spread-eve të kuotimit përtej vlerave normale. Megjithatë, forcimi i tij në atë periudhë mbarti edhe devijime afatshkurtra, të nxitura nga faktorë psikologjikë, të cilat u evidentuan veçanërisht në gjysmën e dytë të muajit korrik.
Lorenc Rabeta/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.